{ غ ـآرقـآت ف دوامـة الحـب - قصـة سُعـُوديـة - رومـآنسي .. }

شذى مسكت قلبها وطلت من الشباك .. شافت وجهه بس من جنب ، وما كان صعب عليها انها تعرفه ..
شذى حست وجهها يحترق : وربــي انه هو .. هو هو ..وااااي ما اصدق ..
اتصلت فيه ..
فهد : هلا حبيبتي وينك ؟!..
شذى وهي تضحك غصب عنها من الوناسة : هههههههههههههه .. فهد انا جنبك .. حلفتك بالله قولي انك انت اللي لابس أبيض بأبيض ..
فهد ضحك : هههههههههههههههه .. انا هو بشحمه ولحمه ..
ولف فهد راسه لورا يطالع اللي جالس بالسيارة جنبه .. وشافته شذى لما تأكدت فعلا انه هو .. وضحكت وهي ودها تصرخ من الفرح : ههههههههههههه .. الحين تاكدت .. يالله انا جاية .. ( وتنهدت ) .. آآآآآآآآآه يا فهد ما صدق انك على بعد خطوات مني ..
فهد يضحك : ههههههههههه .. وانا انتظرك يالله تعالي ولا جيت انا بنفسي أخذك ..
شذى بدهشة : تجي ؟!.. لا لا .. لا تجي اخاف عليك من عيون البنات اللي عندي ..
فهد راقت له الفكرة وفتح الباب ونزل : انا جاي بنفسي ..
شذى شهقت لما شافته ينزل : ...... فهد لا تجي والله بمووووت ..
ضحك فهد وكمل طريقه وقرب من سيارتهم .. وعيون البنات تاكله اكل وهو يقرب .. كان فيه وسامة وجاذبية الشاب السعودي اللي يذوب البنات ..
وصل للسيارة وفتح الباب الخلفي بجرأة .. وظهروا له اربع بنات كل وحدة طاقه اللثمة والميك اب كامل .. لفت نظره وحدة منهم كان مبين من عيونها النعومة .. كانت أكثر وحدة لفتت نظره ..
فهد وهو ينقل عيونه بينهم : وين شذى ؟!..
وصله صوتها خافت والرجفة فيه : انا هنا ..
كانت آخر وحدة وهي اللي لفتت نظره .. يعني جالسة بجنب الباب من الجهة الثانية .. سكر فهد الباب اللي فتحه بصمت وراح للباب الثاني عند شذى وفتحه ..
فهد ماسك الباب ومبتسم وعيونه بعيونها : هاااا شرايك فيني ؟!!...
شذى تطالعه بعدم تصديق : انت مجنووون ..!!!
فهد ضحك : هههههههههههه ... مجنووون فيك يا بعد عمري .. والحين ياليت تنزلين وتشرفيني بسيارتي ..
شذى داخت وراحت فيها .. أول مرة تشوفه يضحك بعيونها .. كانت تسمع ضحكاته بس الحين قاعدة تشوفه يضحك ..
قبل ما تنزل لفت للبنات برجا .. يعني ادعوا لي ما أمووت ..
ونزلت وهي بصعوبة تشيل روحها .. سكر فهد الباب ، وبجرأة مسك يدها وسحبها معه ..
وشذى ما اقدر أوصف حالتها ، كل هذا كان فوق احتمالها .. ودها تصرخ .. ودها تصيح .. ودها تطير .. ودها تموت ..
فهد فاجأها بتصرفاته .. ورغم الارتباك والتوتر الا انها تحس بنشوة سعادة ..
فتح لها الباب وركبت .. وبعدها راح لمكانه وركب والابتسامة على وجهه : نورتيني يابعد هالدنيا ..
شذى ساكته ومنزله راسها والحيا بياكلها : .........
ضحك فهد وحرك السيارة رايحين للفور سيزن بالمملكة .. وشغل مسجل السيارة على اغنية عبدالمجيد " ماقدرت اصبر "
فهد لف لشذى اللي لازالت منزله راسها : حبيبتي ليش الحيا .. طالعيني والله مشتاق لهالعيون ..
شذى رفعت راسها اخيرا وحطت عينها بعينه ..
فهد بانبهار : كل هالحلا عندك وما علميتيني ..
شذى : مو انت اللي كنت مو راضي اشوفك وتشوفني ..
فهد : انا ؟!.. ابدا حببتي تعرفيني ماكنت رافض .. بس كنت انتظر الوقت المناسب .. وهذا الوقت جا اخيرا .. آآآآآخ ماصدق شذى حبيبتي .. بسيارتي وجالسه جنبي .. !!!.. ما صدق ..!!
شذى تضحك : ههههههههههه لا صدق .. انا اللي حاسه نفسي بحلم ..
فهد يغني مع الاغنية وهو يطالع شذى : ماقدرت اصبر وجيتك .. قبل موعدنا بساعه ...
كملت شذى وهي تضحك : والغريب اني لقيتك .... تنتظر قبلي بساعه ..
فهد : دامك انتا مثلي مشتاق ... ليه دايم بينا فراق ..
وصلوا للممكلة أخيرا ونزلوا للفور سيزن ودخلوا المطعم وكل واحد ماسك يد الثاني .. شذى مو مصدقة اللي يصير حاسه نفسها بحلم حلو وبتصحى منه بأي لحظة .. اخذوا لهم زاوية بعيدة شوي عن الناس وجلسوا ..
وانتظر فهد شذى تكشف له عن الوجه القمر خلف اللثمة .. وشذى طالعته باحراج : اخاف ما أعجبك ..!!
ضحك فهد : ههههههههههه وليش ما تعجبيني .. يكفي هالعيون العذاب ..!!
نزلت شذى عيونها للأرض وكشفت له وجهها اخيرا .. اللي طلع أحلى بكثـــير مما تصوره هو ..
ظلت شذى منزله راسها مو قادره ترفعه .. ولا سيما ان فهد ظل ساكت فترة وما علق .. أو بالأحرى منبهـر !!!
شذى رفعت راسها شوي شوي تشوف ردة فعل فهد .. وبعد لحظات شافت ابتسامته .. ابتسامة رضا ..!!

طلعت شوق من غرفتها وراحت لغرفة ندى ودقت عليها الباب .. دخلت شافتها توها طالعه من الحمام بعد ما تحممت .. وقاعدة قبال المراية تسرح شعرها ..
راحت شوق بضيق وجلست على طرف السرير وعيونها على ندى ..
ندى انتبهت لنظرات بنت عمها العابسة .. اللي مبين فيها الضيق : شفيك شوق ليش معبسه ..!!!
قامت شوق واقفة وتحركت بضيق : وش اقولك .... معاملة اخوك لي تضايقني ..
ندى لفت لها مستغربة : تقصدين فهد ؟!.. ليش وش سوا ؟!..
شوق : وش تفسرين رده لي لما طلع اليوم .. ولا لما رجعت من الشرقية .. حتى كلمة حمدلله عالسلامة ما سمعتها منه ..
ندى : انتي حاسه بشي ؟!..
شوق تنهدت بضيق : ما أدري .. بس حاسه انه زعلان من شي .. مع اني تأسفت منه عاللي صار مني وهو قال انه سامحني .. بس معاملته لي غريبة ..
ندى وهي ترجع تلف للمرايه وترتب شعرها : شوق انتي تتوهمين .. ولا فهد دايم كذا لا تصيرين حساسه مرة ..
سكتت شوق وراحت لطاولة عليها براويز لكل افراد العايلة ..
ندى حاطة كل صورة على حدة ومرتبتهم على هالطاولة .. صورة ابوها وامها ونجلاء وفهد ونايف ومنى وعمر .. حتى انها أضافت صورة شوق لهم بالفترة الأخيرة ..
وقفت شوق تتأمل الصور وحدة وحدة واستقر نظرها أخيرا على صورة فهد .... مدت يدها ورفعتها وتأملتها عن قرب ..
ورجعتها موجة المشاعر من أول وجديد ..
سألت نفسها عن حقيقتها للمرة المليون .. هذا اللي يسمونه الحب ؟؟!!.. هذا اللي يسمونه الهيام ؟؟!!.. انا عمري ما حبيت ولا أدري وش هي حقيقة الحب .. لكن فهد هو الوحيد اللي قدر يحيي فيني احاسيس غريبة اول مرة بحياتي اعيشها .. هو الوحيد اللي يقدر يخليني اعيش هالمشاعر الغريبة .. الحلوة ..!!!
حطت شوق البرواز مكانه ولفت لندى المنشغله ..
شوق بهدوء : ندى ..!!!
ندى بدون ما تلف لها : هلا ...
شوق وهي تحس بوجهها احمر من السؤال : اقول .... كان نفسي من زمان اسألك عن ... الـ .. عن الحب !!..
تركت ندى اللي بيدها ولفت لها : عن الحب ؟!!..
شوق هزت راسها بالايجاب : ايه .. وش كنتي تحسين لما كنتي تحبين احمد ...؟!!!
ندى قطبت وقربت منها : وش هالسؤال الغريب .. اول مرة تسألين مثل هالسؤال ..!!
شوق بعدت عنها وراحت عند السرير وجلست وهي تلعب بيدها .. كانت تبي تتأكد وش حقيقة هالمشاعر .. هل هو فعلا الحب اللي سمعت عنه وعن الناس اللي طاحوا فيه .. وذاقوا حلاوته ولوعتـه .. تبي تعرف اذا كانت طايحه بحب فهد أو لا .. تبي تستقر على بر .. لأن هالاحاسيس اللي تغزوها لأول مرة مسببه لها اضطراب كل ما شافته ، او بمجرد احساسها انه قريب منها ..
شوق : ادري .. بس سؤال خطر ببالي وحبيت اسأل .. وش كان شعورك اذا حسيتي ان احمد قريب منك .. وش كنتي تحسين اذا طاحت عينه بعينك ؟!!!..
ندى استغربت من سؤالها بس جاوبت .. تنهدت وهي تتذكر : آآآخ .. وش اقولك بس .. اذا شفته احس بقلبي وده يطير .. احس من دقاته وده يطلع برا ضلوعي .. واذا حسيت انه قريب مني تصير عيوني بس تدور عليه .. واذا غاب لحظات احس بلهفه فضيعه له .. ووله كبير يملا صدري اذا غاب عني لحظات ..
طالعت شوق ندى بصمت .. وتقبلت داخل نفسها الحقيقة اللي اكتشفتها للتو .. هي واقعه بغرام فهد .. واقعه بحبه .. طايحه بحب ولد عمها من راسها لأخمص قدميها ... كل اللي قالته ندى ينطبق عليها ..!!!
فعلا كل ما غاب عن عينها تحس بشوق كبير ووله .. واذا طاحت عينها عليه تحس بقلبه بيطير من كثر دقاته ..
تنهدت شوق بعمق وهي ما تدري هل تفرح أو تحزن من اللي صار لها ..
ندى باستغراب : بس تعالي .. وش سر هالسؤال الغريب .. لا يكووون تحبيــن ..؟!!!
شوق طالعتها بارتباك وضحكت بتصنع .. وقررت تخفي هالسر عن الكل حتى عن ندى : هههههههههههههه .. وش قلتي ؟!.. احب ؟!.. ههههههههههههه .. يا حليلك يا ندى تعرفين تنكتين ؟!.. هههههههههههههههه ..!!!
ندى بخبث : علينا .. علينـا يا شووق .. انتي وراك شي من هالسؤال .. بس اعترفي احسن لك ..
شوق مستمرة بالضحك بتصنع : هههههههههههههه .. مافي شي بس حبيت اخذ خبرة .. عشان لما أحب اخبرك .. ههههههههههههه ..!!!
عفست ندى وجهها وبنظرة شك لشوق : أيـه طيب بنشوف ...
شوق : ليش يعني منتي مصدقتني ؟!..
ندى هزت كتفها ورجعت تكمل شغلها : لا .. بس سؤالك بهالوقت بالذات غريب .. شمعنى الحين تسألين ..؟!
شوق ماعرفت ترد فبكل بساطه هزت كتفها ، يعني مو قصدي شي .. وأخيرا طلعت من الغرفة هرب..

ببيت ابو احمد .. طلعت نوف من غرفتها وهي مو حاسه بعمرها .. من جت من الجامعه لما الحين وهي نايمه بتواصل .. والحين ( طالعت ساعة يدها وهي تترنح نازله الدرج ) الساعه صارت تسع بالليل .. يعني أكثر من ست ساعات قيلولة .. حشا ماصارت قيلولة هذي يا نوف !!!..
وصلت للصالة تحت وهي حاسة بصداع يضرب براسها .. شافتها امها وسهى اللي كانت جالسه .. ماقدرت سهى تمسك بطنها من الضحك ..
سهى منسدحة عالكنبة من الضحك : ههههههههههههههههه .. نوف تكفين روحي شوفي شكلك .. ههههههههههه .. وربي ولا شبح في بيت رعب .. ههههههههههههههاي ..!!!
نوف كانت ماشيه ناحية المطبخ ، وقفت وطالعتها بطرف عينها بنظرة مررررعبة .. وخاصة انها توها قايمة والنوم للحين على جفونها ..
نوف بنبرة هادية عن غير المعتاد لكن مرعبة ومهددة : وربي لو ما تبلعين لسانك لأجي انا وأبلعك اياه ..
سهى سكتت واختفت ضحكتها وقربت من امها مثل الطفلة الصغيرة تحتمي فيها : يممممه والله تخوفين .. روحي روحي ببلع لساني ..
نوف عطتها نظرة اخيرة أقوى من الأولى وراحت المطبخ .. ومن دخلته سمعت ضحكة سهى وراها .. مالها خلق مناقر معها ، راسها يعورها ، فصلحت لها كوب كوفي يروقها ..
ولما رجعت للصالة لقت امها وسهى يتناقشون بسالفة المزرعة اللي قرروا يروحون لها نهاية الاسبوع .. سهى مبين عليها الحماس ، لأنها كانت تتمنى تطلع للمزرعة خاصة مع بنات عمها ..
نوف ظلت تسمع لكلام امها واختها بصمت ، ومبين عليها وكأن الموضوع ماهمها .. لأنه أصلا ماهمها ..
سهى لفت لنوف اللي كانت تطالع التلفزيون وترتشف قهوتها : نوووف ..
نوف بدون ما تبعد عيونها عن التلفزيون : همممم ...
سهى : وش رايك بالمزرعة ؟!.. ما اشتقتي تروحين لها ، والله من زمان عنها صح ..؟!.
نوف ببرود : لا غلط .. لأني ما اشتقت لها ولا أبي اروح ..
سهى : وليش ما تروحين والله بتفوتين عليك الوناسه والفلللله ..
نوف : وناسه مثل هذي ما أبيها ..
سهى : وش فيك طيب ليش ما تبين تروحين ..؟!!.. غريبة ما توقعت كذا يكون ردك ..
نوف كرهت انها تستمر بالكلام في هالموضوع ، لأنها ماتبيهم يحنون عليها ويجبرونها .. فقامت واقفه بتروح فوق
نوف : انا بطلع لغرفتي ..
وراحت فوق وهي خايفة من سكوت امها اللي قبل شوي .. كانت ساكته وما علقت على رفضها وخايفه لا تكون بتجبرها في النهايه ..
قررت تتمسك بقرارها مهما حاولوا يقولون .. اذا هذي الروحه من تخطيط بدر فـ أنا ماني رايحه يعني ماني رايحه ..
دخلت غرفتها وقفلت الباب عشان مايزعجها احد ، وسمعت جوالها يدق .. راحت تشوف لقتها دلال بنت عمها ..
نوف : هلا دلال ..

دلال : أهليـن وسهليـن بنت عمي .. وش هالدلع هذي ثالث مرة ادق ولا تردين ..
نوف وهي تدور بالغرفة وتشرب من كوبها : ماكنت بغرفتي توني جايه ..
دلال مبين بصوتها الحماس : المهم ماعليــنا .. سمعتي عن طلعتنا للمزرعة نهاية هالاسبوع ..
نوف ببرود وهي زهقانه من تكرار هالموضوع على راسها : ايه سمعت ..
دلال بحماااس أكبر : أخييرا فكروا فينا انا والله مشتاقه لها من زمااااااااااان ..
نوف سكتت ولا هامها الموضوع من اصله وجالسه تشرب من الكوفي باستمرار تبي تنسى كل اللي تفكر فيه ..
نوف : ............
دلال صرخت لما تنرفزت : ألوووووووووووووه ...
نوف صرخت وهي توقف من صوتها اللي صم اذنها : وجععععععععععع يوجعك يا حماااره وش شايفتني صمخى ما اسمممممع ..أذني راااااحت وعمى ..
دلال متنرفزة : انا ادري عنك .. !!! .. انا متحمسة وانتي تكلميني بكل برووود .. ولا كأن شي هامك ..
نوف : ايه .. ماهمتني
دلال : شلون يعني مارح تجيـن ..؟!..
نوف : لا ..
دلال باستغراب : وليش ان شالله وانا اللي داقه عليك لأن فرح قالت لي نتفق معكم .. احنا البنات ..
نوف بتساؤل : نتفق ؟!... نتفق على أيـش ؟!..
دلال : انا وفرح وحنان نبي نسوي شي سبشل لما نروح هناك .. نبي نفاجئ بدر ..
نوف جتها غثة لما سمعت باسمه : بدر ؟!.. يـع ..
دلال عصبت : لا تقولين يع .. مهما كان هذا اخوي ... انا بس ابي اعرف انتي ليش تتكلمين عنه دايم كذا .. ذابح لك أحد ولا ماكل حلالك .. هاااااا
نوف : مالك شغل ليش اتكلم عنه كذا .. انا حرة اكلم اللي ابي بالطريقة اللي تعجبني ..
دلال تنهدت وهي عارفه انها مارح تنتهي اذا دخلت بنقاش محتدم مثل هذا مع نوف : طيب ما علينا .. تدرين وش بنسوي ؟!..
نوف بنبرة عدم اهتمام ، بس انها قاعده تجاري دلال : وشو ؟!..
دلال : نبي تخليها مناسبتين .. أول شي رح نحتفل بميلاده .. وثاني شي نبي نعيد فرحتنا فيه بنجاحه .. ونبيها تكون عائلية وننبسط على كيفنا هالمرة .. بعيد عن المعازيم ..
نوف بقرف : يااااع !!!.. وش قلتي تحتفلون بميلاده ؟!.. بعد هذا اللي ناقص .. عيب يا ماما ما يجوز هالشي ..
دلال بطولة بال : اووووكيه .. مارح اقول عيد ميلاده .. بنقول يوم ميلاده طيب .. وبعدين بلا هالمثالية ، تراها كلها يوم وننبسط ..
نوف : لا اسمحي لي .. انا مارح اشارك معكم لأني اصلا مارح أجي ..
دلال باحباط وضح بصوتها : وليش عاد ماتجين ؟!.. والله الوناسة من غيرك ما تكمل ..
نوف مصممة على موقفها ولا يمكن تتراجع : لا يعني لا ..
دلال بضيق : اوووفففف .. خلاص بالطقــاق عمرك ما جيتي .. يا شين اللي يتغلون ..
نوف راحت للمرايه وفكت شعرها لم تناثر على كتفها بدلال : يحق لي يا حبيبتي .. وبعدين نصيحة وحدة اتمنى تفهمونها كلكم .. ترا هالأخو اللي انتم فرحانين فيه ما يسوى تراااااب ..
دلال عصبت وسكرت السماعه بوجهها .. ونوف ظلت تضحك ، خلهم يفهمونه على حقيقته .. انا خلاص مستحيل اعطي بدر أي فرصة انه يستغلني .. انا ماني غبية ولا مخفة عشان تمر علي هالحركات الملعوبة يا بدر .. واحلم يصير لك اللي تبيه .. احلـــم ..
مسكت جوالها ورجعت تفتح المسجات اللي وصلتها منه .. وتعيد قراءتها كل شوي ..

دلال من بعد ما سكرت من نوف دخلت عليها فرح تشوف آخر الأخبـار ، على حسب اتفاقهم ..
فرح : وش صار كلمتي بنات عمي ولا لا ؟!!..
دلال متنرفزة : كلمت نوف هالعلة .. تقول مارح تجي هي ..
فرح باستغراب : ليـش ؟!..
دلال : ما أدري .. واللي قاهرني انها تسب وتشتم في اخوي بدر وانا مو قادره اسكتها .. قهرتني ..!!!
فرح شوي وهزت كتفها : بكيفها اصلا نوف دايم كذا متقلبة المزاج .. محنا جابرينها على شي ..
دلال بقهر : آآآآخ بس لو تسمعين وش قالت عن بدر .. تقول تراه ما يسوى تراااب .. تقهررررني ..
فرح ضحكت وطلعت لأنها عارفه كلام نوف عن اخوها .. مو هالمرة هي الأولى اللي تتكلم فيها نوف عن بدر بهالاسلوب .. ففرح اعتادت على عدائية نوف تجاه اخوها رغم انها تجهل الأسباب الحالية .. في بالها ان الاسباب ترجع لأيام ماكانت نوف صغيرة .. ومحد يدري ان بدر بدال ما يخف زاد تولع فيها وشغف ..
اما دلال .. مع انها أصغر وحدة من خوات بدر وعمرها 17 سنة الا انها تعز اخوها بدر بشكككل كبير وماترضى عليه وتشوفه مفخرة لها ، وتقدر به ترفع راسها امام الناس .. هذا غير حبها له ..
طلعت دلال من غرفتها بعد فرح وشافت بدر يطلع من غرفته ووجهه متغير .. مبين تعبان وعيونه غريبة ..
راحت له بلهفة وهي خايفة عليه : بدّووور .. شفيــك ؟!..
طالعها بدر بابتسامة باهته بس حنونه : شفيني ؟!.. مافيني شي ..
دلال قربت وحطت يدها على جبهته : تعبااان شي ؟!..
بدر مد يده وقرص خدها بمرحه المعهود : مافيني شي .. انا مثل كل يوم ..
دلال بقلق : متأكـد ؟!..
بدر ضحك وراح عنها بينزل : شلون يعني انا اكذب ..؟!..
دلال : لا بس ... ( وتتأمله ثاني مرة من فوق لتحت بقلق ) .. بس شكلك غير اليوم .. كأنك تعبان ...
بدر وهو ينزل وناوي يطلع : متضايق شوي بس .. تعرفيني توني قايم من النوم وانا العاده اذا قمت اكون شوي متضايق ..
دلال وهي تراقبه ينزل : وين بتروح الحين ؟؟!!..
بدر بحنية : بطلع .. تبين شي مني اجيبه وانا راجع ؟!..
دلال ابتسمت له وبنفسها تسب وتشتم نوف ألف مليون مرة لأنها تغلط على اخوها اللي ما فيه منه : لا شكرا ..

بدر طلع وركب سيارته ، واتصل على سلمان عشان يلاقيه بأي مكان .. وتلاقى وياه بوحدة من الكافيهات .. سلمان لاحظ وجهه المتغير واقلقه هالشي ..
سلمان : حبيبي بدر ...
بدر تنبه له : هلا ..
سلمان : شفيــك ؟!.. مو من عادتك تجلس ساكت بمكان ومالك لا حس ولا صوت ..!!!... ( بدر ساكت ) ... بدّووور .. شفيك ساكت ،....
بدرطالعه بنظرة هادية وهز كتفه .. مو لاقي اللي يقوله ، أو لأنه ماله خلق للكلام .. ولاّ كان حصل اللي يقوله .. نوف صارت تحتل الجزء الأكبر من تفكيره .. وكل مالها تتربع على عرش قلبه ، وهو مو قادر يمنع هالشي ، حاول مرارا وتكرارا انه يبعدها عن ذهنه ، بس هي عنيدة حتى بقلبه .. ابتسم بدر ، مدري ابتسامة ضيق ، او ابتسامة سخرية .. سلمان يراقب ملامح بدر بصمت .. وبدر مبتسم وهو سرحان ، نوف مع علمه لكرهها له متولع فيها ، وكل يوم عن يوم يزيد شغف فيها وهو مو لاقي حل عشان يوقف هالشي ويمنعه انه يملك قلبه ، اكثر من ماهو مملوك منها ..
سلمان قاطع سرحانه بضيق : بس خلااااااص تراك زودتها حبتين ، ليش ساكت تكلم وخل عنك هالأفكار اللي بتذبحك ..
مارد بدر لأنه اصلا مو لاقي رد ، وهو يفضل الصمت بهالحالات ..
سلمان يحاول ينسيه اللي قاعد يفكر فيه : الا ماقلت لي .. وش صار على مشكلتك اللي مدري من وين جت ؟!..
بدر رفع عينه له وهو شبه متبلد من هالسالفة اللي تقريبا يأس منها : أي مشكلة ؟!..
سلمان رفع حاجب مستغرب : أي مشكلة ؟؟!!!!.. اجل اللي صاير لك مع بنت عمك ما تسميه مشكلة ؟!.. الا مشكلة وكبيرة بعد .. مسألة مستقبل هذي ترا ..
بدر بعد عينه بكل برود ولا كأن الموضوع يخصه : أدري .. وش قالوا لك عني ما احس ولا افهم ..
سلمان مبين حريص على هالموضوع : اجل وش ناوي تسوي ؟!.. ترا بنت عمك هذي زودتها كلمها خلها ترجعها ولا انا اللي بتدخل واكلم الوالد واقوله عن كل شي وهو يكلم عمك ..
بدر تحرك بمكانه من الضيق : سلمان !!... هذي مشكلتي وانا بحلها بطريقتي .. رجاء لا تتدخل انا بتصرف ..
سلمان يطالعه باستغراب وضيق بنفس الوقت ، لأن بدر ما تصرف للحين بجدية بهالموضوع الخطير : شلون بتتصرف وانت حضرتك جالس بمكانك ماتحركت ولا خطوة عشان تنقذ نفسك ..!!!
بدر يبي ينهي الموضوع : سلمان حبيبي بس خلاص ، قلت لك قفل السالفه انا بتصرف ..
سلمان يطالعه بشك وريبة : والله اشك انك بتسوي شي ..!!
بدر : سلماااان .. خلاص قفل السالفه لا تشيل همي ..
سلمان هز راسه بيأس من عناده ، بدر يقول بيحل السالفه بس ما تحرك للحين ولا سوا شي وهذا مو في صالحه لازم يستعجل ولا كل شي بيرووح ..
سلمان : اوكي بسكت .. بس ان ما استعجلت بتندم ..
بدر بضيق كبير : طيب بس قفل هالسالفه اللي غثتني .. ولا عاد تجيبها على لسانك لأني مليت من تكرارها وانا فاهمها .. معد ابي اسمعها ...
سلمان رفع يديه باستسلام : حاااااااضر مارح اجيبها على لساني ، والحين خل نغير السالفه ..
رجع بدر لصمته المطبق مرة ثانية ، اما سلمان راعى هالشي وجلس ساكت ينتظر رفيقه لما يتكلم على راحته ..
بدر بشكل تلقائي وبدون تخطيط مسبق مسك جواله وأرسل مسج لنوف بدون ما يفكر باللي ارسل فيه .. عقله بذيك اللحظات متوقف واللي قاعد يحركه كان قلبه ..

هب الشمال وجابت
الريح ذكرى
ياليت لي فـ بال الأحباب طاري
ياما على وصلك تحريت
ذكرى
وياما ع طاريك عطرت داري
لمصافحك كفي من العام
عذرا
تغار من لهفة يميني
يساري

وأرسل بعدهــا :

اتركـ جمالكـ ياحبيبي على جنب
غير الحلا يعجبني بزود طيبكـ
كلكـ على بعضكـ تجنن وتنحب
حظي كبير اللي جعلني رفيقكـ
إن كان حبي بنظر بعضهم ذنب
يامرحبا والله بذنب يجيبكـ
ماقول غير الله يخليكـ يارب
ويعمي عيون من حسدها تصيبكـ

طول سكون بدر وطول وقته وعيونه على شاشة الجوال ، وسلمان يراقبه بقلق ، كانت حالة بدر غريبة اول مرة سلمان يشوفه فيها ..
بدر العادة بأي مكان تكون البسمة على شفاته ما تفارقه .. والضحكة عالية والكل حولهم يسمعها هذا غير السوالف اللي تخلي الشباب سواء يعرفونه من قبل او ما يعرفونه يجون ويسمعون له بسبب روحه المرحة الخطيرة ، واللي تجذب كل اللي حوله له .. بس الحين بدر ماهو بدر .. عابس ، اختفي من عيونه لمعانها المميز .. شكله غريب ، تعبان ، منهك ، محطم ، والأهم من هذا كله ، انـه عــاشق ..
شي يتعب القلب .. بالأخير اقنعه انهم يطلعون بالسيارة يفترون ويروحون أي مكان بمحاولة من سلمان انه ينسي رفيقه ..


نجلاء كانت على حالها من حزنها وصدمتها اللي هزت كيانها بقسوة ، صحت بعد ما انتبهت لنفسها ان النوم غلبها بغرفة طفلها المنتظر .. لكن .. هل بيجي ولا لا ؟!!..
قامت واقفه ومشت بتثاقل لخارج الغرفة بعد ما سكرت النور والباب .. ولما وصلت للصالة لفت تطالع الساعة المعلقة .. الساعة عشرة ونص .. وسعود للحين ما رجع ..
مر ببالها النقاش اللي دار معه اليوم .. كانت تتمناه يكون حلم .. تتمناه كابوس وصحت منه ، اللي قاله لها سعود اليوم عمرها ما تخيلت انه يصير .. بعد هالحب اللي جمعهم ، وبعد هالوئام ؟!.. ممكن في شي بيفرق بينهم ؟!..
سمعت صوت الباب يفتح بهاللحظة وظلت بمكانها ما تحركت ، العادة لما تسمع صوت الباب تركض له بلهفة وتستقبل سعود بحرارة .. بس الحين ، سكنت في مكانها وما تحركت .. بانتظار سعود يجي امامها ويبرر لها طلب امه ..
بعد لحظات طل عليها سعود والشماغ على كتفه ، والانهاك والتعب ماخذ مأخذه منه .. ابتسم لها بحب ، وكانت ردة فعلها انها صدت وراحت للمطبخ تداري دموعها .. وحزنها ، وخوفها ، ......
دخل عليها بالمطبخ وهي مو معطيته وجه ، وبدت تحضر للعشا بصمت ، تطلع الصحون وتروح وترجع للثلاجة تاخذ حاجاتها ..
سعود وقف عند الباب ينتظرها تعطيه نظرة ، لكنها كانت تعامله ولا كأنه موجود ..
سعود بهدوء وهو متعنز عالباب : نجلاء ...
نجلاء تتحرك بالمطبخ بدون ماترد : ...........
سعود يتنهد وهو عارف بالضبط وش اللي مضايقها : حياتي ...
نجلاء معطيته طاف : ...........
سعود وهو تعبااان حده : كلميني طيب .. مايصير كذا ما تردين علي .. تعالي خلينا نتكلم ..
نجلاء ولا حياة لمن تنادي ، بدت تغسل الصحون بالمغسله ومعطيته ظهرها .. اما هو راح لها بقلة صبر وسحبها من ذراعها يجرها معه للصالة ، وجلسها عالكنبة بالغصب وهي مبوزة والقهر مبين بعيونها ..
سعود ضحك وركع قدامها : ههههههههههههه .. الله لا يخليني .. ليش زعلانه طيب ؟!..
نجلاء تطالعه بحنق والدموع مستعدة بأي لحظة انها تهل : تبيني اضحك حضرتك .. بالله هذا شي يضحك .. امك ناويه تهدم حياتنا وانت تبيني اضحك واتبسم .... و.........
غابت كلماتها وغلبتها دموعها ، وغطت وجهها بيديها ودخلت بنوبة دمووع حاارة ، وهي تتكلم بكلمات مو واضحة من البكي ..
سعود حن عليها وما يرضى ابدا تكون حبيبة قلبه وروحه وشريكة حياته تذرف هالدموع لسبب يعتبره هو.. أقل ما يقال عنه انه سخيف !!!.... سخيف لأنه مستحيل يصير ..
قام وجلس جنبها وضحك بحنية : يعني يا حياتي انتي مفكرة اني بسوي هالشي ؟!..
نجلاء مغطية وجهها ومستمرة بالدموع : ...........
سعود بعتاب واضح بصوته يخالطه بعض الأنهاك والتعب : حبيبتي وربي اني تعبان لا تزيدين علي .. شلون تفكرين اني ممكن اسويها .. افكر انتحر قبل لا أسوي هالشي يا نجلاء .. انتي حبيبتي وحياتي وتفكرين اني ممكن اهدم حياتي معك بيدي ..
هدت نجلاء وسكتت بعد ما سمعت هالكلمات .. رفعت راسها وطالعت بعيونه ، بحب ، ورجاء انه ما يتركها مهما صار .. لأنها تحبه ، تحبه وتمووووت فيه ولا تقدر تعيش بدونه ..
نجلاء بصوت متقطع : طـ... طيب وامك ؟!.. ليش طلبت هالطلب ؟!..
تنهد سعود وبعد عيونه عنها : امي يا نجلاء .. مريضة ... ومفكره انها بتموت ، واحنا لنا فترة متزوجين وما جبنا أطفال لحد الحين ، فتبيني اتزوج عشان تشوف عيالي ..
نجلاء صدت عنه وهي منزله راسها ، هالسؤال صار يراودها الفترة الأخيرة ، ليش انهم لحد الآن ما انرزقوا بأطفال .. باقي كم شهر ويكملون السنتين على زواجهم ..
ونجلاء بدت تخاف لا تكون العلة فيها ..
سمعت سعود يتكلم وهو يطوقها بذراعه وبصوته الحب الكبير والحنية : وانا لا يمكن اجيب طفل من غير حياتي وقلبي نجولة ...نجلاء حياتي انا اذا طفل بيجي من غيرك ما أبيه ، أبيك تكونين انتي امه ، ولا يضايقك اللي عرفتيه لأني مستحيل ارضى فيه ( ويقرب من اذنها ويهمس وهي تبتسم ) .. لأنك انتي كل اللي لي وما أبي غيرك ..
زادت ابتسامة نجلاء ولفت له تطالعه بصمت .. والحين لاحظت التعب الغريب على وجهه وبحنية حطت يدها على خده ..
نجلاء : شفيك حبيبي ؟!.. تعبان الحين ؟!..
سعود تنهد : ما شفتي الأخبـار ؟!!..
نجلاء هزت راسها بالنفي وعيونها تتساءل ، وقف سعود بيروح للغرفة ، وبانت بهاللحظة بقعة حمـراء بكمه وشوي على صدره .. الحين لاحظتها نجلاء .. وشهقت وهي توقف مرتاعة ..!!!!
نجلاء وهي تأشر مرتاعه للي تشوفه : سعود ..... وش هالأحمر ..؟!!!!
سعود ضحك ضحكة لا تتناسب مع الموقف : وش تشوفين ؟!.... دم ..!!!
شهقت نجلاء بخوف : دم ؟!!!... لـ ... ليه شفيــك ؟!!.. وش صاير لك ؟!!..
سعود وهو يحك راسه ويفرك عيونه بتعب : سلامتك ... اليوم كانت عندنا عملية مداهمه .. وواحد من الضباط اللي كانوا معي صابوه بطلقة ..
مسكت نجلاء قلبها وقربت منه وهي ترتجف : عملية ؟!!!!.. عملية وشو ؟!!.. وانت صار لك شي ؟!!..
قربت منه تتفحصه والشي اللي اقلقها بقعة الدم الكبيرة بكمه ..
سعود : اكيد قالوا كل شي بالأخبار ..
نجلاء : وهالدم دم مين ؟!!..
سعود : دم الضابط اللي كان معي ..
نجلاء بخوف : لا يكووون مات ؟!!..
سعود ابتسم : لا الحمدلله ما مات .. والحين هو بالمستشفى .. اصابته مو خطيرة ..
تنهدت نجلاء بارتياح : الحمدلله .. وانت متاكد انك سالم ماصار لك شي ..
سعود مبتسم بطولة بال: لا .... والحين تسمحين لي اروح اخذ لي دش وارتاح ..
نجلاء ضحكت براحه لما تأكدت انه سليم ومعافى : لا .. هههههههههههه .. اسمح لك اكيد والحين تفضل روح لما اخلص العشا ..
راح سعود للغرفة بينما نجلاء بالمطبخ تكمل اعداد العشا ، ولما خلصت رتبت السفرة عالطاولة بالصالة والتلفزيون مفتوح .. وهي تتحرك رايحه راجعه من المطبخ للصاله لفت انتباهها خبر بالتلفزيون .. وقفت مكانها تسمع وتشوف ..
الخبر كان عن مداهمة صارت اليوم بمدينة جدة في وحدة من البيوت موجودة بحي سكني معروف .. المداهمه كانت ناجحة نتجت عنها مقتل واحد من الارهابيين واعتقال ثنين منهم ، كانوا ينوون تفجير وحدة من السيارات بقرب مجمع سكني ..
واثناء هالخبر صدر مثل البيان عن وزارة الداخلية تشكر كل من شارك في هالعملية .. وقائد الفرقة اللي مثلوا العملية ..
وصدر اسم سعود زوجها بأول القائمة ... اللي كان قاد فرقته بكل نجاح وشارك بفعالية فيها ..
ابتسمت نجلاء بفرح وفخر وراحت لسعود بتخبره ، لقته للحين بالحمام ، رجعت بتطلع من الغرفة لكن دق جواله اللي كان مرمي عالسرير مع بوكه ومفاتيحه .. راحت بتشوف لقته رقم غريب ... مو رقم امه ولا اخوه ولا احد من اهله .. الاسم ماكان ظاهر بس مجرد رقم وهذا يدل على ان الرقم مو مسجل اساسا بالجوال ..
ترددت ترد او لا ، بس بهاللحظة سعود طلع وشافها واقفة والجوال بيدها وتطالعه ..
سعود يمسح وجهه بالمنشفه : مين اللي يدق ؟!..
هزت نجلاء كتفها ، وسعود راح واخذ الجوال يطالع الرقم ، وعبس وارتفعت عينه لنجلاء بنظرة غريبة ..
نجلاء وهي تنقل نظرها مابين سعود والجوال : مين اللي يتصل ؟!..
سعود مارد وكل اللي سواه انه شال عمره وطلع برا الشقة .. نجلاء كلت الحيرة قلبها وعقلها ، من هاللي يتصل بعد ..
طلعت من الغرفة بدورها ومرت بجنب باب الشقة ، وسمعت صوت سعود يتكلم بالسيب الخارجي للشقة .. مبين بصوته العصبية واضحة ، وقفت تحاول تسمع الكلمات ، ماسمعت شي واضح سوى صوته مرة يعلى ومرة ينخفض بس ما ميزت الكلام ، رجع لها الخوف .. معقولة تكون امه ، .. اكيد رجعت تطالبه بطلبها ..
ضمت نجلاء يدها لصدرها بخوف وتسندت عالجدار بجنب الباب ...
أكيد امه .. اكيد تبي تخرب حياتي وحياته .. لمعت دموعها بس نجلاء تذكرت كلام سعود لها وحاولت تمسك نفسها .. سعود وعدني ولا يمكن يخلف بوعده .. وحتى لو كانت امه ، يظل الوعد وعد ...!!!
نفضها من مكانها صوت تلفون الشقة يدق ، راحت له وردت ..
نجلاء : الووو ..
....: السلام عليكم ..
نجلاء قطبت مستغربة وراحت عيونها ناحية باب الشقة ، شلون يصير هالشي ..!!!!!
.... : نجلاء !!
نجلاء انتبهت لنفسها وزادت حيرتها : هلا خالتي ..
ام سعود : هلا بك .. شخباركم وشخبار سعود ؟!..
نجلاء تتكلم بدون وعي وكل فكرها عند سعود : تمااام خالتي كلنا بخير ..
اذا خالتي ام سعود جالسه تكلمني الحين ... اجل سعود من جالس يكلم ..!!!..
ام سعود بصوتها الفخر : شفتي وش قالوا بالأخبـار ؟!..
نجلاء ابتسمت : ايه خالتي .. بكل القنوات الخبر الحين ..
ام سعود : وسعود عسى ما تضرر بس ..؟!!
نجلاء : لا ارتاحي خالتي حالته كويسه ومافيه شي ..
ام سعود : وينه الحين ؟!.. ابي أسلم عليه وأبارك له ..
نجلاء ما تدري وش تقول : خالتي سعود جالس يكلم تلفون الحين ..
ام سعود : من يكلم الحين ؟!!
نجلاء ونفسها تعرف جواب لهالسؤال : والله ما أدري ..
هالاتصال اللي جا سعود الحين ، تشبه الاتصالات اللي كانت تجيه طوال اسبوع فات ، يعني الاتصالات ماكانت من خالتي لحالها ، فيه أحد يتصل فيه ويخليه بهالعصبية دايما ..
يعني .. يعني سعود خدعني لما قال ان الاتصالات بس من امه ..
ام سعود : خلاص اجل ماطول عليكم .. ولما ينتهي سعود ويفضى خليه يتصل فيني ..
نجلاء : ان شالله ..

في بيت ابو فهد .. الكل مجتمع عند التلفزيون يتابعون الخبر .. وخاصة بعد ما انذكر اسم الضابط سعود زوج نجلاء فيه ، وانه هو منفذ العملية هو وفرقته ..
نايف المعجب الأول بسعود متابع للخبر من أوله .. ابو فهد وام فهد نفس الحاله جالسين ومتابعين ومعهم ندى وشوق ومنى ..
اما فهد .. للحين غايب عنهم بموعده الغرامـي مع شذى ...!!!
ابو فهد بفخر : والله انه بطل .. قدر يجيبهم واحد واحد ..
ندى بوناسة : يااااااااي ماصدق ان هالانسان اللي طيحهم واحد ورا الثاني يكوون زوج اختي ..!!!.. يابختي ..!!!
شوق تضحك على خبالها ونايف يتنحنح بفخر..
نايف يلف لأبوه : يبا انا قررت ..
ندى : وش قررت يافهيم ..
نايف مارد وظلت عيونه على ابوه : يبا انا كنت مقرر من قبل يا اكون ضابط او طيار .. لكن الحين اقول ضابط يعني ضابط ..
ابو فهد يضحك ويفتخر : ههههههههههههههههه .. كفو والله ، قدها وقدود ...
تنحنح نايف برضى وفخر بنفسه ورجع عيونه للتلفزيون ,.. كانت الساعة 11 وربع لما طالعت ام فهد الساعة ، ولفت لابو فهد ..
ام فهد : شرايك تكلمه الحين وتبارك له وتشوف اخباره ، وان شالله ما يكون تضرر ..
ابو فهد راقت له الفكرة : ايه عطينا لازم اتصل فيه ..
اتصل عليهم ورد عليه صوت يحبه قلبه ..
نجلاء : يا هلا ..
ابو فهد : يا مرحبا والله بمرة البطل .. شخباركم شعلومكم ؟!..
نجلاء تضحك : هههههههههههههههه .. الله يسلمك يبا ، احنا بخير الحمدلله ..
ابو فهد : شخبار الضابط ؟!!
نجلاء تضحك : هههههههههههه ، بخير يبه يسلم عليك .. تدري يبه كم اتصال جا لنا بربع ساعه بس .. ست اتصالات من اهل سعود واصدقائه وحتى من صديقاتي .. كلهم يباركون له ولي ويسلمون عليه ..
ابو فهد يضحك بفخر : أيــه والله اللي سواه ورجاله مو شي سهل .. وينه انا حبيت اسلم عليه ..
نجلاء : هذا هو بيجي ..
وبعد لحظة يمسك سعود السماعه ويرد بفرح : يا مرحبا عمي ..
ابو فهد : مرحبتين .. مبروووك يا سعود الله يجزاك خير ويحميك من كل شر .. الحمدلله عالسلامة عالخروج سالم ..
سعود : الله يسلمك .. مشكوور عمي ماعليك زوود ..!!
بعد مكالمة مليئة بالتهاني والتبريكات على هالانجاز يسكر ابو فهد السماعة وهو حاس بفخر عظيم لكون ان سعود فقط زوج بنته ..
وهو يسكر السماعه يدخل فهد عليهم والكل يلتفت له .. تقدم فهد لهم وهو يطالعهم بنظرة غريبة ، مستغرب من تجمعهم الغريب قبال التلفزيون ..
شوق رجعت لها داومة المشاعر اللي عرفت بداخلها انه الحب ماغيره ، وبعدت عيونها عنه وحطتها بالتلفزيون ..
فهد : شفيكم ؟!..
ندى تأشر له بيدها وبحماااااس كبير : تعااااال شوف الأخبار والقنوات وش قاعدة تقول عن اللي صار بجدة اليوم .. رجل اختك سواها ... طيحـــهم ..!!
فهد باستغراب : سعود ؟!.. شفيه ؟!!..
جلس فهد بالكنبة وشاف الصور والأخبار .. وما خفى عن الكل فرحه وافتخاره بهالشي ..
فهد : وكلمتوه ؟!!
ابو فهد : كلمته قبل لا تدخل .. بخير وعافية ما صار له شي .. الحمدلله ..
تموا متسمرين يتابعون الأخبار بمختلف القنوات ، لما جت الساعة 12 .. الكل طلع لغرفته الا فهد جلس بالصالة لحاله ، ندى سبقت شوق لفوق ، وشوق راحت للمطبخ تاخذ لها جلاس موية .. ورجعت للصالة بتطلع لغرفتها ولما وصلت للدرج سمعت جوال يدق ، كان جوال فهد .. وسمعت صوته يرد ..
فهد : هــلا ..

شوق صار الفضول يذبحها ناحية فهد .. صارت تحس وتشتاق انها تعرف كل شي عنه .. بالنسبة لها فهد .. حبيب مجهول .. !!!.. هذا اللقب اللي طرى على بالها وهي تطالعه يكلم ويضحك .. ماكذبت لما قالت حبيب مجهول .. بالنسبة لها اقتنعت انها غارقه بحبه ، لكن هو بالنسبه لها مجهول ، كل اللي تعرفه عنه انه ولد عمها .. لكن فيه اشياء تجهلها .. نفسها تعرفها .. والسؤال الاول اللي خطر ببالها هو : ياترا .. هل فهد مر بتجربة عاطفية من قبل .. هل بقلبه احد .. هل هو عايش حب أو عاش حب من قبل .. مثل ما انا بديت اعيشها معاه ؟!!!..
نست شوق نفسها وهي واقفة عند الدرج وعيونها على فهد ، اللي قام واقف بعد ماسكر التلفزيون واتجه للدرج بيطلع فوق .. وانتبه لها واقفه تطالعه بسكون ..
شوق ما انتبهت له الا لما وقف قبالها ناوي يطلع وبعيونه مستغرب والجوال باذنه : شفيك واقفه ؟!!..
شوق ببلاهه صحت من سرحانها وافكارها : هاااه ؟!!..
فهد مارد الا انه بدا يطالعها من فوق لتحت بتساؤل .. وشوق تدراكت موقفها : لا .. بـ.... بس كنت ... آآآآ ..
فهد ما اهتم ورجع للجوال وهو يطلع الدرج : ايوا هلا ... لحظة ... هههههههههههههه ..!!..
شوق طلعت الدرج وراه واذنها تسمع لكل كلمة يقولها .. اكتشفت انها صارت تهتم كثيــر له .. وهو مبين مو معطيها وجه ..!!
اتجه فهد لغرفته وشوق لغرفتها .. وقبل لا تدخل سمعته يناديها : شـووق ..
من غير شعور التفتت له تلبيـه : لبيـه ..!!
وقفت عند باب غرفتها تشوف وش يبي .. وهو كان يبي يقولها شي لما شافها بتدخل غرفتها ، يبي يقولها أي شي .. بس انتبه لنفسه وتراجع باللحظة الأخيرة .. مع ان شذى هي اللي تكلمه عالطرف الثاني .. لكن فيه جزء منه يحس فيها بقربه .. ومايقدر يتناساها مثل ماهو يحاول .. كان خاطره يقول لها " تصبحين على خير " .. وماقدر يقاوم هالرغبة ..
شوق تنتظره يتكلم .. كان واضح يبي يقول شي لها ، ونفس الشي قاعد يكلم بالجوال .. مبين مشغول !!!
شوق : فهد بغيت شي ؟!!..
فهد ابتسم لها اخيرا وأشر لها بيده : تصبحين على خير ..
شوق كان تأثير ابتسامته وكلمته عليها كبير .. وابتسمت له بدورها ابتسامة احلى : وانت من اهله ..
دخلت لغرفتها مبتسمة .. كلمة وحدة منه قلبها بلحظة .. رمت بنفسها عالسرير أي كلام .. ما هقيت ان الحب يسوي مثل ما يسوي فيني ..!!!..
فهد عقب ما دخلت شوق غرفتها دخل هو لغرفته وشذى للحين معه عالخط ..
شذى بعتاب : اشووووفك مليت مني تقولي تصبحين على خير ..
فهد ضحك : ههههههههههاي ماكنت اكلمك كنت اكلم شوق ..
مسك نفسه وهالمرة طلع اسمها من لسانه من غير شعور .. آآآآآخ وش كثر هالانسانة ملكت قلبـه ..
شذى : شووق ؟!!!.. أهااا .... قصدك اختك ؟!!..
فهد تذكر انه قال لها من قبل ان شوق تصير اخته : ايه .. اختي ..
شذى : عاد تدري .. يا حظها اذا صارت تشبهك .. جناااان انت يا فهد جناااان ..!!
فهد ابتسم وهو ينسدح عالسرير : ما تشبهني .. بس هي حلوة .. ( وسرح يتذكر حلاوتها وضحكتها وابتسامتها السحرية ) .. وربي ما شفت احلى منها بحياتي .. ملاك طلعت بحاتي فجأة وخذت قلبي و.........
قاطعته شذى مستغربة : هييييي فهود .. ( وبعتاب ) .. ترا أغااااااار يعني هي أحلى مني ؟!.. وبعدين هذي اختك شلون تتكلم عنها كذا ..
سكتت شذى زعلانه وفهد ضحك لما انتبه لكل الكلام اللي قاله : هههههههههههههه .. يا حبيبتي انتي بغيتي تعرفين شكلها وانا قلت لك ..
شذى وهي زعلانه : طيب شلون تقول خذت قلبك ؟!!.. وانا ويني فيه مو انا اللي ساكنه بقلبك بس ..؟!!!..
فهد : الا انتي بقلبي وهي بقلبي ..
شذى بدلال وحب للتملك : بس طبعا انا حبيبتك ومكانتي عندك غيرها .. صح ؟!!..
فهد يتكلم من ورى قلبه .. وده يقر بهالشي بس هو داخله عارف العكس : صح ..
شذى نست موضوع شوق وهي ما تعرف حقيقتها ووش تكون بالنسبة لفهد : اووكي .. بس حبيت اشكرك عالعشا الرومنسي الليلة .. ما أكذب عليك يا فهد اذا قلت لك انها من أحلى ايام حياتي .. وكأنه حلم من الأحلام ..
فهد يضحك : ان شالله نكررها ..
شذى : اوكي ماطول عليك تصبح على خييييير ..
فهد : وانتي من اهله ..

الجــــــــــــــزء 29




يوم الخميس نهاية الاسبوع .. وهذا هو اليوم الموعود المتفق لزيارة المزرعة برحلة الكل يتوقع انها بتكون حافله بالفرح والحيوية ..
طلع بدر من البيت وهو حامل معه بعض الاغراض وراح يركبها السيارة ..الساعة الحين تسع الصبح والمزرعة برا الرياض ويبيلهم وقت على ما يوصلون ..
لما حمل بدر سيارته طلعت دلال اخته بتركب ..
دلال بحماس : يالله بدّور رح قلهم يخلصون بسرعة .. ورانا طرررريق ومشوار طويييل ..
بدر ضحك وركب بمكان السواق .. ودلال ركبت معه قدام وسكرت الباب ..
بدر التفت لها مستغرب : وش جابك هنا يالله ورى ..
دلال حطت يدها على خصرها : يا سلام !!!!.. مالي شغل انا بركب قدام هالمرة .. امي بتركب مع ابوي وفرح تنقلع ورى مع حنان ..
بدر وهو يضحك : صدقيني بتجي فرح وتسحبك من شعرك وترميك ورى ..
دلال تبتسم بدلع : وليش يعني عيب اجلس جنب اخووي !!.. ولهانة عليك يا أخي ..
بدر يبتسم : لا مو عيب ..!!..
دلال تتحرك بجلستها وتجلس مقابلته بوجهها : المهم عاد اقولك .. يحنا مسوين لك مفاجأة اليوووووم ..
بدرباستغراب : مفاجأة ؟!!... مفاجأة وشو ؟!!..
دلال تلوح بيدها : لاااا .. لا لا لا ما ينفع اقولك .. كل شي بوقته حلو ..
بدر : مين اللي مسويها ؟!!..
دلال : احنا البنات .... ( وبعد تفكير للحظة ) .. الا نوف طبعا لأنها مارح تجي ...
سكت بدر وهو يطالع دلال .. بعدها صد عن اخته وطالع قدام .. ودلال لاحظت صمته المفاجئ ..
دلال مدت يدها لها وهزته من ذراعه : هااااا وين رحت ..!!!
بدر ابتسم بعذوبة ورجع يلف لها : وليش بنت عمك مارح تجي ؟!.!!
دلال هزت كتفه بلا مبالاة : ما أدري ليش بالطقاق هي الخسرانه ..
بدر سكت يفكر .. يحس بأحاسيس متناقضة .. مايدري ليش يحس بالراحه هاللحظة لأنها بتكون بعيد عنه ويقدر يرتاح وينسى الحب داخله فترة من الوقت .. ونفس الوقت يحس بالشوق لها لأن له وقت ما شافها أو حتى سمع صوتها ..
الشهادات معد صارت تهمه لانه تذكر انه يقدر يسترجعها ، لو مو من نوف بيسترجعها من الجامعة نفسها ..
لكن الحب هو المشكلة .. الحب مذلة ..
تنهد وهو يفكر ان بُعد نوف عنه فترة من الوقت بتكون فيها راحة له ولقلبه ولو لوقت بسيط .. أهم شي يحس بالراحة اللي فاقدها ..
دلال : وانت ليش يهمك جيّت نوف من عدمها ؟!!!..
بدر ابتسم وتكلم بغموض : مايهمني .. وبيني وبينك احسن انها ما تجي ، كذا برتاح ..
دلال طالعته ببلاهه : شلون يعني بترتاح !!.. بدر اذا غلطت عليك نوف لا تسكت لها .. تراها تقهرني أحيانا ..
بدر تنهد بعمق وبقوة خلا دلال ترتاع وتنتفض مكانها : آآآآآآآآآه ..
دلال مرتاعة : هيييي شفيك !!.. بدرترا انت من كم يوم مبين انك تعبااااااان ...
بدر : سلامتك مافيني الا العافية ..

دق جوال بدر، وكان المتصل سلمان ..
بدر : هلاااا ..
سلمان : صباح الخير ..
بدر : صباح الأنوار ..
سلمان : ماشالله صاحي من الصبح شعندك ؟!!!.. كنت اظنك نايم ..
بدر : نسيت !!!.. ما قلت لك امس اني بطلع مع الأهل للمزرعة ..
سلمان ضرب راسه : اهااا الا بس نسيييت .. اوكي الله يهنيك ووسع صدرك وانسى كل الي تفكر فيه ترا حلها بسيط .. وبنت عمك ترا ما تستاهل كل العنا اللي تمر فيه .. انساها ..
بدر بنبرة هادية : انت تقول كذا .. لكن قلبي يقول العكس .. لكن بقولك أحسن شي انها مارح تجي اليوم .. اقدر ارتاح شوي ..
سلمان ابتسم : زييييين اذا ماجت هذا لمصلحتك .. وبعدين لا تفكر انها البنت الوحيدة بالعالم فيه غيرها احسن منها بمليون مرة .. لا تعلق املك عليها ..
بدر لف بطرف عينه لاخته دلال واللي نسى وجودها .. شافها تطالعه بفضول ومبين انها مركزة بكل كلمة تنقال ..
بدر يحاول يغير من نبرة صوته عشان ما تشك : هاا .. خلاص خلاص يصير خير .. اعلمك بعدين لما اشوفك ..
سلمان استغرب : وش تعلمني يالأخ !!... اقولك البنات حولك كثار وألف وحدة تتمناك .. لا تفكر بوحدة ما تستاهلك ..
بدر تضايق من كلامه ، لكنه ضحك : خلاص يصيرخير .. ههههههههههه .. ومبررروك مقدما منك المال ومنها العيال ..
سلمان مثل الابله : هااا .. أي مال وأي عيال !!!... بدر انت معي ..؟!!
بدر : هههههههههه .. ايه معك وسلم عالمدام .. يالله عطيتك وجه .. الأهل جايين الحين ..
سلمان ضحك لما فهمه : هههههههههههههه .. ايه قول من زمان ان الأهل عندك لا تخليني مثل الأطرش في الزفه ماني فاهمك ..
بدر : اوووكي .. مارح تزورنا بالمزرعة هناك .. لازم لازم تجي ..
سلمان : خلاص اوكي .. احاول اخلص شغلي بدري ومالك غير طيبة الخاطر ..
بدر : انتظرك ..
سكر منه ومباشرة وصله صوت دلال يملأه الفضول ..
دلال بخبث : تعااااال .. وش دخل نوووف بالسالفه ؟!!!..
بدر وهو يلتفت لها رافع حواجبه ، ويتصنع عدم المعرفه : نوف ؟!!!.. أحد جاب طاري نوف !!!..
دلال : الا جبتها .. سمعتك تقول لرفيقك انها مارح تجي اليوم .. وانك تقدر ترتاح شوي .. من تقصد ؟!!!..
بدر يضحك بتصنع : ما كنت اقصدها .. انتي فهمتي غلط ..
جت دلال بترد بس انفتح بابها وطلعت فرح بتركب ..
فرح : دلووول .. يالله ورى مع حنان ..
دلال قربت من بدر وتعلقت بذراعه : مالي شغل بركب هالمرة جنب بدّور ..
فرح طالعت بدر ، وبدر غمز لها تخليها هالمرة .. ورجعت فرح لدلال ..
فرح : اووكي .. هالمرة بس ..
ركبوا الكل بالسيارتين ، البنات مع بدر والأم مع ابوهم وأخوهم الصغير .. وتحركوا ماشين للمزرعة اللي تبعد عن الرياض مشوار ساعتين ..

في بيت ابو احمد الكل جاهز ومستعد للطلعة الا نوف ، كانت للحين نايمة بالسرير وغرقانه بأحلامها ..
وحلمها هالمرة بينها وبين بدر !!..
حلم غريب أول مرة يمر عليها .. ما كان في الحلم صراع او حرب كالعادة .. كانت هي تمشي وتبحث بعيونها عن شي .. مو أي شي .. من نظرات عيونها مبين انها تبحث عن شي غالي عليها وخايفه انها تفقده .. لما ظهر بدر قبالها مباشرة .. بابتسامة غريبة ونظرة أغرب ما تعودتها منه !!.. حاولت تقرب منه وتبادله الابتسامة وهي مرتاحه انها لقت المفقود منها .. !!.. كان بدر هو المفقود اللي تدور عليه ..!!! لكن لما حاولت تقرب ابتعد بدر .. وكل ماقربت خطوة ابتعد بدر عشر خطوات .. لما تبدلت نظرة بدرللحزن وتبلورت دمعه غريبة بعيونه ... وأخيرا رفع يده يودعها وتلاشى بالهوا أخيرا .. !!!!
فتحت نوف عيونها فجأة ونفسها متسارع والخوف يدب بعيونها .. لثواني حاولت تسترجع اللي شافته وتميز وش كان بالضبط ..
انا حلمت ببدر ؟!!!!!... قلبها بدل ما يهدا زاد فيه الخوف من حلمها الغريب ..
ظلت نوف بالسرير ما قامت ، تحاول ترجع للنوم بس الحلم مطبوع بجفونها ينعاد عليها باستمرار ..
انفتح الباب فجأة ودخلت سهى لابسه حتى العباية ..
راحت لها وهزتها : نووووف !!... قومي بنمشي الحين ..
ماتحركت نوف وظلت تفكر باللي شافته بمنامها ، وسهى ما انتظرت سحبت الغطا ورمته بالأرض ..
نوف بعصبية : سهىىىىىىى .. انقلعي عني خليني نايمه ..
سهى : قومي نوف لازم تروحين محد بالبيت حتى الخدم بناخذهم معنا ..
نوف قامت جالسه وهي ودها تكفخها : وانا شدخلني .. روحوا وخلوني لحالي .. مابي أروح ..
سهى بحزم : امي لزمت تجين وانتي تعرفين امي قالت تجين يعني تجين .. محد جالس بالبيت ويمكن نبات بالمزرعة لما بكرة ..
نوف فتحت عيونها بصدمه وطالعت سهى : بتباتون هناك ..؟!!!
سهى هزت كتفها : احتمااال كبير .. واظن انك ما ترضين وتخافين تجلسين لحالك بالبيت لبكرة .. صح ؟!!..
نوف تضايقت : هو يعني لازم تباتون .. ارجعوا بالليل ..
سهى : نوف لا تحكمين الناس على كيفك .. قومي الحين أمي مصرة تجين وماترضى تجلسين لحالك بالبيت لبكرة .. الدنيا مافيها أمان ..
نوف سكتت ما عرفت وش تسوي .. ما تبي تروح ولا تبي تجلس بالبيت لحالها لبكرة .. وخاصة ان الخدامات بيروحون حتى .. تخاف من الجلوس لوحدها لفترة طويلة ..
معناته ان بدر قدر يهزمني .. وبيخليني اسوي اللي يبيه ..
بدر !!؟؟!!!!!.. رجع لها الحلم ثاني مرة وسكتت وهي تفكر فيه .. تكدر مزاجها وبان الضيق بوجهها ..
سهى انتبهت لسرحانها وابتسمت بحنان واضح لنوف : قومي صدقيني بتستانسين هناك .. مافي سبب ترفضين الروحه عشانها ..
نوف طالعت اختها ودموعها تجمعت بعيونها فجأة وبدون سابق انذار .. خلاص قدرتها عالاحتمال انهارت معد تقدر تتحمل أكثر .. بدر يحاربها وهي تعبت وملت من أخذ اسلوب الدفاع ..
نزلت راسها ودموعها تتساقط منها .. بدر قاعد يضغط عليها بشتى السبل .. وهي عارفة بقرارة نفسها اني اللي سوته غلط بحقه .. لكن هو اللي اجبرها تسوي هالشي ..
حتى غيابه عنها هالفترة وغياب اتصالاته عليها ضغطت عليها بشكل رهيب .. ما تدري تفهم هالشي بحسن نية ولا سوء ظن فيه ، كانت مقتنعة انه ناوي يشهر بها ويعلم الكل باللي سوته .. اذا مو اليوم بكرة ، واذا مو بكرة اللي بعده .. المهم انه مقتنعه ان بيحصل هالشي .. وأول العارفين بيكون ابوها ..
ماتدري وش اللي بيصير وقتها ..
حتى مسجاته الغريبة بالفترة الاخيرة لها دور بالضغط اللي عليها .. تصرفات بدر انقلبت فجأة لدرجة انها معد صارت تفهمه وتفهم وش ناوي عليه ..
وهي ملت حتى من تصرفاتها ناحيته .. بدر اجبرها تتصرف تصرفات مو من عاداتها .. حتى الحلم اللي راودها اليوم أثر عليها بشكل هي مو فاهمته .. !!!
سهى طالعت اختها بشفقة وجلست بجنبها وبدت تربت على كتفها : نوف حبيبتي .. لا تبكين ترا مافي شي يستاهل هذا كله ..
نوف بدون شعور حطت راسها على كتف سهى وتكلمت بصوت مكتوم ملئ بالعبرات : سهى انا معد صرت افهم شي .. صارت تصرفاته تسبب لي صداع .. معد صرت افهم اللي قاعد يسويه ..
سهى بحنية : من تقصدين يا نوف ..؟!!..
نوف بدون شعور أو حتى تفكير طلع الاسم منها : .... بدر ...
سهى ابتسمت : يعني لهالسبب رافضه تروحين .. عشان بدر هو اللي مقرر هالشي انتي رافضه تروحين .. نوف ترا بدر ولد عمك ما يستاهل تكرهينه هالكره ..
نوف غمضت عيونها ودموعها تتساقط مثل المطر .. وهي عايشه بصراع نفسي من بدت تصرفاته بالتحول .. وانه بدل ما يتحداها ويثير غضبها كالعادة صار هادي ساكن ويرسل لها المسجات الغريبة باستمرار ..
نوف بصوت مكتوم بالدموع : انا اكرهه ؟؟!!!!... والله معد صرت اعرف نفسي اني اكرهه او لا ..
سهى : مهما كان هذا ولد عمك ومهما سوالك من قبل يضل ولد عمك .. والحين قومي استعدي لأننا بنمشي بعد شوي ..
مسحت نوف دموعها وهزت راسها بالإيجاب .. وطلعت سهى من عندها وهي مبتسمة ..
حتى سهى ما تدري باللي سواه لي ولا باللي سويته انا ..
رجعت عبارة سهى تمر بخاطرها " مهما كان هذا ولد عمك ومهما سوا يضل ولد عمك " .. هو صح ولد عمي لكن هو عمره ماحسسني بهالشي .. دايما يحسسني انه عدوي مو ولد عمي ..
استعدت نوف وتجهزت وهي كلها هموم بهموم .. تحس احيانا بالذنب وتحس احيانا بالعكس .. دموعها ما يمديها تجف الا سرعان ماترجع تهل .. افكارها حول بدر تكاثرت وسببت لها صداااع .. و تزيد عليها لحظة بلحظة ..
ياربي احد يقولي اللي سويته صح ولا غلط ؟!!... غلطت انا لما دافعت عن نفسي بهالطريقة .. ؟!!..
لبست عباتها ونزلت تحت وهي تمسح آثار الدموع اللي رافضه تجف .. كل ما انتهت من فكرة حلت بذهنها فكرة جديدة ، وجرّت معها سيل جديد من الدموع ..
لقت الكل ينتظر تحت ، الا ابو احمد واحمد يحملون الأغراض بالسيارتين ..
لما خلصوا دخل ابو احمد يطلب منهم الخروج : يالله ترا بدر اتصل فيني ..!!
رفعت نوف عينها لأبوها بخوف .. من جاب اسم بدر ، خافت لا يكون قاله شي .. بس ابوها ما بين عليه انه عارف شي ..
طلعوا للسيارات وركبوا .. سهى ونوف مع احمد .. وام احمد وريم ومحمد مع الوالد .. وامل بتجي مع زوجها بوقت لاحق ..
طول الطريق نوف جالسه ورى وساكته تدراي دموعها ، سهى جالسه قدام مع احمد سوالف وضحك ..
رجعت نوف تفتح جوالها وتقرا المسجات المرسلة من بدر.. وكل ماقرت أكثر كل مازاد صداع راسها .. لانها مو فاهمه وش سر هالمسجات .. هل هو خداع من بدر ولا يقصد من وراها شي ثاني ..؟!!.. هل هي خطة جديدة منه ..؟!!.. أو هل هي محاولة منه انه يطلب رضاها .. أو .. أو .. أو .......!!!!!!!
سمعت سهى تكلمها بمرح : نوووف .. شفيك ساكته ..
نوف بصوت كئيب كله حزن وهم وغم : خليني ساكته مابي أكلم احد ..
سهى رق صوتها لاختها : حبيبتي .. خلي ببالك انك رايحه هناك للوناسه .. ولا تفكرين بأشياء تافهه مالها معنى ..
نوف بصوت باكي : تافهه بالنسبة لك لكن انا لا ... احس اني مجرمة وغبية ما تفهم شي ولا تفهم اللي حوالينها ..
سهى واحمد طالعوا بعضهم باستغراب مو فاهمين كلامها ..
احمد رفع عينه لها بالمرايه بنظرة حنونه : نوف قلبي شفيك مو من عادتك ..
نوف وهي تحاول تغالب دموعها : مافيني شي خلوني لا تسألوني .. انا نفسي مو عارفه شي ..
احمد بحنية : وش اللي مو عارفته .. وش اللي مضايقك ..!؟؟!!
نوف ما استحملت الضغوطات اللي تزيد عليها لحظة بلحظة وخبت وجهها بيدينها واسترسلت بالبكي : والله ما أدري ما أدري .. ماني فاهمه شي مو فاهمه شي وراسي بينفجر .. بيحملوني الذنب الحين وهو مو ذنبي .. مو سببي هو اللي تعبني وانا تعبت منه قولوا ليش يكرهني ..!!!
احمد ارتاع عليها ووقف السيارة على جنب ، بعد ماحس انه كلامها مو طبيعي .. سهى لفت لها وهي مرتاعه بعد ..
احمد ماتم مكانه نزل من السيارة وفتح باب نوف : شفيك نوف تعبانه ؟!.. مين اللي يكرهك ومين اللي بيحملك الذنب ؟!.. نوف شفيك بالضبط ..؟!!..
نوف هدت شوي وظلت تمسح دموعها ، وبصوت متقطع : مافيني شي ...
احمد : شلون مافيك .. وكلامك روعنا كلنا .. انا وسهى ..
نوف حست انها فلتت لسانها ، بس ماقدرت حست انه كلام لازم يطلع منها : مافي شي .. انا متضايقه اليوم ..
احمد بهدوء وحنيه : كل هذا لأنك ماتبين تجين ...؟!!
نوف وهي منزلة راسها بانهزام وتفكيرها كله لبدر : ما أدري .. ماكنت ابي اجي ولا كنت ابي اجلس بالبيت لحالي يومين .. تعرفني أخاف ..
احمد بنظرة : قولي لي طيب من تقصدين بكلامك ..
نوف صدت عنه وهي تمسح دموعها : محد .. ما اقصد احد ..
احمد قبل ما يسكر بابها ويرجع لمكانه حب يتأكد ان مافيها شي : اكيد مو تعبانه .. ؟!..
نوف هزت راسها نفي ببراءة الأطفال : ........ لا ..
احمد هز راسه ورجع لمكانه وتحركوا .. سهى التزمت الصمت .. هي فاهمه ان المقصود بدر لكن ماتدري ليش قالت نوف هالكلام .. كلكم تدرون ان سهى ما تدري باللي صار بين نوف وبدر لذلك للحين تعتقد ان عقدة نوف من بدر من صغرها مستمرة معها للحين .. بدون ماتدري باللي استجد بينهم الشهور اللي طافت ..
نوف خايفه ان بدر يخبر الكل باللي سوته .. وبعدين هي بتروح بخبر كان .. خايفه ان هدوء بدر هالفترة وراه انتقام ، بينفذه اليوم وقدام الكل ..
خلال اليومين اللي راحت ، ماتدري ليش صارت تحس انها فقدتـه !!!!!!!... بالأول صار يشكل جزء مهم بيومها ولازم بكل يوم يمر عليها وتعيشه ، يظهر لها بدر ولو بأسلوب ما تحبه هي ..
مع انها كانت كارهه هالشي .. لكن شعورها بأنها فقدت جزء من يومها صار يداهمها .. هالشعور كان يغيضها بالأول وحاولت تحاربه .. لكنه اكتشفت انه أقوى منها و استسلمت بسرعه .. وتملكها شعور انها مارح تقدر تتغلب عليه ..
التفكير باللي صاير لها مع بدر .. بدا يشغلها ، أكثر فأكثر .. لما تملك ذهنها وتفكيرها ..
زيادة على كذا .. الحلم الغريب واللي أول مرة تشوفه ..!!!

في بيت ابو فهد ..الساعة عشر الصبح .. ندى بغرفتها صحت من بدري ولأنها مالقت شي تسويه وشوق نايمه .. جلست ترتب غرفتها وتعيد تنظيمها .. كان بمكتبها أوراق زايده تبع الجامعه ما تحتاجها فبدت تجمعها .. فتحت وحدة من الدروج وطلعت كل شي قديم .. وبينها شافت الورقتين اللي خذتهم من نوف بالقوة ذاك اليوم ..!!!
وقفت وبدت تقلب بالأوراق يمين وشمال وهي تعفس وجهها بضيق .. كان لازم من خذتهم رجعتهم لبدر .. بس شلون ؟!!!..
والله نوف هبله ومجنونه !!!...
رمت الورقتين عالسرير وبترجع تفكر وش تسوي فيهم .. ولما خلصت من شغلها خذت الورقتين وراحت لشوق بغرفتها .. ولقتها نايمه ..
ندى بصوت عالي وهي تهز شوق بقوة : ياللللللللللللللللا قومي قومي .. الساعة 6 المغرب ..!!!..
شوق بهدوء فتحت عيونها وطاحت عالساعة شافتها 10.30 الصبح .. ورجعت غمضت عيونها وهي عارفه ان ندى تبيها تصحى عشان تقابلها ..
شوق : يا كذابة أي مغرب .. تونا الصباح .. روحي عني لأني ماني قايمه لا تحاولين ..
ندى جلست بطرف السرير بكامل ثقلها لما هزته وهي تقلب بالاوراق بيدها : قومي بسألك شي .. شي مهم مهم مدري شسوي فيه ..
شوق : ندى مو وقته الحين لما أقوم .. لا تصيرين علة عاد .. اووففف ..!!!
ندى : افا والله افا .. انا علة ؟!!!.. الله يسامحك .. ( ورجعت تهزها ) .. قومي بسألك شي عن بدر ..
فتحت شوق عيونها وفوق راسها علامة استفهام : بدر ؟!!.. مين بدر ؟!!..
ندى : نسيتيه ؟!... بدر حق نوف ..
ضحكت شوق مع ان الوقت مو مناسب .. بس عبارة " بدر حق نوف " ضحكتها .. وش دعوة اللي يسمعها يقول مو انسان هذا .. كأنه ملك من أملاكها ..!!!
ندى : قومي لا تضحكين أكلمك جد والله .. انا متورطه مدري شلون أتصرف ..!!!
شوق قامت جالسه بتملل : هاا .. يلله قولي اللي عندك .. المرة الجاية بقفل باب الغرفة عشان ماتدخلين علي وتزعجيني .. حرام عليك لسا الساعة عشر ونص .. وش تبيني اقوم اسوي ..
ندى بابتسامة وسيعة ودلع : قومي قابلي حبيبتك ندى ..
شوق ظهر على وجهها علامات قرف مصطنع : ياع الله لا يقوله ..!!... انتي حبيبتي كان انتحر !!...
ندى بكبرياء وهي تضرب راسها بالأوراق : من قدك أصلا .. يحصلك انتي بس .. ( وتذكرت الأوراق بيدها ) .. ايييه صح شوفي هالأوراق .. وش أسوي فيها ..
شوق خذت الأوراق وقلبت فيهم وهي تفرك عيونها كل لحظة والثانية .. لما قرت الأسم ورفعت راسها لندى باستغراب ..
شوق : وش جاب هذي عندك ؟!!!... بدر خالد ؟!!!!
ندى : هذا ولد عم نوف .. وخذت هالأوراق عندي مؤقتا وانا ناويه ارجعها له .. بس مدري شلون ..
شوق تذكرت : اهاااا .. بدر !!!... نوف دايم تتكلم عنه ..
ندى : قولي لي وش اسوي فيهم .. وشلون أوصلهم له ؟!.. تلقينه الحين عافس الدنيا عليها مسكين ..
شوق بعدم اهتمام : عااادي يقدر يطلع بدالها ..
ندى : أدري .. بس افرضي انه يحتاجهم بهالوقت .. وعلى ما يطلع وحدة يبيلها ايام عشان توصل ..
شوق لاحظت الشريط اللاصق اللي حاطتهم ندى بشكل مايل عند زاوية الورقة : وش هالشريط ..؟!!!..
تنهدت ندى وهي تذكر احداث ذاك اليوم اللي طلعت فيه مع نوف للسوق وشافوا هناك بدر ورفيقه وصار اللي صار .. خبرت شوق بالسالفه كلها ، وشوق مرة تضحك ومرة تستغرب ومرة تبلم مو مصدقه الي تسمعه .. كل هذا صار وهي كانت بالشرقية ..!!!
ندى شافت ساعتها : تدرين بتصل على نوف بشوف اخبارها .. مو من عادتها من كم يوم ما اتصلت علي ..

راحت ندى لغرفتها وجابت الجوال ورجعت عند شوق واتصلت عليها ..
نوف ردت بصوت كله هموم ومو مبين فيه أي حماس : هلا ..
ندى ابتسمت وفكرت انها نايمه وهي اتصلت بوقت غلط : اهلين .. سووري لا يكون نايمه ؟؟!!!
نوف : لا .. طالعين ..
ندى استغربت من نبرة صوتها الميتة : طالعين ؟!!.. وانتي شفيك عسى ما شر !!!
نوف : ما شر مافيني شي ..
ندى : وين طالعين من الصبح ؟!!..
نوف : رايحين مع عمي للمزرعة .. اذا تذكرينها ..
ندى ابتسمت وهي تتذكر لأنها زارتها قبل كذا وقضت فيها أوقات حلوة : اهااا .. لا يكون ذيك .. تصدقين مشتاقه لها لنا أربع سنين يمكن من جيت لها أول مرة .. يااا بختكم بتستانسون ..
نوف : أي وناسه لو تدرين اني رحت مجبورة .. ماكان لي خلقها أبدا ..
ندى تلطف الجو : ماعليك وسعي صدرك وانبسطي لو انا منك أطيـر من الفرحه ..
نوف تنهدت وسكتت : ...........
ندى حست فيها : طيب وصلتوا ولا ؟!!..
نوف بكآبة : لا مابعد .. يبيلنا ساعة على مانوصل .. وان شالله مانوصل ..
ندى شهقت : اعوووذ بالله نوووف وش هالكلام حرااام عليك ... تعوذي من الشيطان واذكري ربك ما يجوز ..!!
نوف تمتمت وسكتت ثاني مرة : ...........
ندى : يالله ماطول عليك .. وبتصل فيك بعدين .. تعرفيني ما اقدر على فراقك ..
كانت تبيها تضحك بس نوف ما ضحكت وقابلها صمت غريب .. كانت ندى عارفه ان نوف للحين شايله بقلبها على بدر .. وبهاللحظة تذكرت الكلام اللي قاله لها طلال عن حقيقة افعال بدر .. فحست انه الوقت عشان تجس النبض عند نوف ..
ندى بحذر بنبرتها : اقوول نوف ... للحين انتي تكرهين بدر ؟!!..
نوف تلاشى صمتها الغريب وحل مكانه لهجة حادة : لا تذكرين اسمه قدامي ..
ندى ارتاعت وخافت : طيب .. طيب .. بس سؤال جاوبيني عليه ..
نوف رجعت العبرة وغطت على صوتها ، وأفكارها عن بدر رجعت تثور بذهنها بعد ما احتاجت وقت عشان تخمدها : ما أدري ما ادري .. نفسي اعرف يا ندى .. معد صرت أفهم نفسي ..!! ولا افهمه هو بعد .. احسه ناوي على شي بس ما أدري اذا احساسي صدق ولا كذب ..
ندى حاولت تهديها وقررت توضح لها بشكل غير مباشر : لا تشيلين هم نوف .. وفكري شوي ترا بدر مهما سوا يضل ولد عمك ومستحيل يكن لك الكره اللي انتي تفكرينه .. فكري صح وفتحي عيونك زين وبتعرفين كل شي بنفسك ..
نوف انرسمت علامة استفهام عملاقة بوجهها : وش قصدك ؟!.. ما فهمت ..!!
ندى ابتسمت وبصوتها الحنان : مابي افهمك انا يا نوف ابيك تفهمين بنفسك عشان تقتنعين .. شيلي من قلبك الكره وصدقيني بتشوفين كل شي واضح قدامك ..
نوف زاد الصداع عليها لأنها حست ان ندى تقصد معاني كثيرة بكلامها وهي مافهمتها : قولي لي انتي .. انتي تعرفين شي عن بدر انا ما عرفه ..!!
ندى : وش بعرف يعني .. انتي بنت عمه وانتي المفروض اللي تفهمينه مو انا اللي افهمك ..
نوف : ندى لا تزيدين فوق همي هم قولي لي وريحيني ..
ندى : لو قلت لك مارح تصدقيني .. لكن انتي اعرفي هالشي بنفسك .. يالله باااااي اشوفك قريب ..
وسكرت الخط بسرعة .. هي عطت نوف الحين أول الخيط وان شالله قريب بتعرف اللي انا اقصده ..

نوف بالسيارة زادت تساؤلاتها وسببت لها صداع رهيب مو متحملته .. تذكرت عبارة ندى " فكري شوي ترا بدر مهما سوا يضل ولد عمك ومستحيل يكن لك الكره اللي انتي تفكرينه " .. حتى انتي يا ندى تقولين هالكلام ..
استرجعت كل كلام ندى .. ياليتني اعرف وش تقصدين.. انا مو مستقرة على بر ابي اعرف وش اللي يصير من حولي .. بس ماني قادره .. ماني قادره ..
- نوووف ..!!
رفعت راسها لما سمعت احمد يناديها : نعم ...
والتفتت يمين وشمال شافت السيارة واقفة بوحدة من المحطات عشان البنزين ، واحمد يطالعها بالمرايه وفاتح الباب يهم بالنزول ..

احمد : قولي لي وش تبين تشربين بنزل أجيب بارد ..
نوف بدون تفكير نطقت اول شي جا على بالها بدون ما تهتم اذا هي تشتهيه او لا : كولا ...
نزل احمد وبقت هي وسهى جالسين بصمت .. بعد شوي ونوف تسبح بأفكارها الكثيرة مرت بجانبهم سيارة وتجاوزتهم ووقفت عند البقالة الخاصة بالمحطة ..
وسمعت صوت سهى كله حماس : نوووف شوفي سيارة بنات عمي هناك ..
رفعت نوف عيونها بسرعة تشوف للمكان الي تأشر عليه سهى ..
سهى : هذا بدر !!!
بسرعة طالعت نوف بالشاب الخارج من السيارة .. كان مبتسم ومبين انه يضحك للي داخل السيارة .. هذي ابتسامة بدر عمرها ما تتغير .. تابعته نوف بعيونها لما دخل البقالة هو بعد .. مبين انه منبسط وسعيد عكس اللي تمر فيه هي ..!!!
وبعد دقايق طلع احمد وبدر معه .. يسولفون ويضحكون وبعدها افترقوا كل واحد رجع لسيارته .. وكملوا طريقهم ..
سهى : وين البقية ما شفت غير سيارة بدر ؟!!!..
احمد : عمي مقرر ما يوقف الا لما يوصل .. بس بدرمعه البنات ..
نوف مستمرة بحالتها من الصبح .. ملتزمة الصمت العميق حتى انها ماشربت اللي طلبته وتبخرت برودته من كثر ماكانت ماسكته بين ايدينها بتوتر ..!!!
بعد نصف ساعة وصلوا لمزرعتهم اللي غابوا عنها فترة أكثر من سنتين والكل مشتاق لها .. المزرعة كانت كبيرة جدا موقعها بعيد عن أي شارع ولازم يدخلون بوسط البر عشان يوصلونها .. داخل المزرعة فلة على الطراز الريفي .. كل شي داخلها وجوها وحتى أثاثها يعبر عن الريف ومناسب لجو المزرعة .. باختصار يحسس العايش داخلها وكأنه بوحدة من الأرياف ..
وصلوا للفلة أخيرا وبدروقف سيارته بجهه واحمد بجهه .. ونزلوا البنات وسهى بحماس ماعدا نوف ماتحركت .. سهى اتجهت للبنات ركض وسلمت عليهم والكل يصارخ من الحماس والفرحة والشوق لهالمكان الجميـل ..

بدر نزل من السيارة يضحك : هههههههههههههه .. بس اللي يشوفكم يقول ما شفتوا خيــر .. يالله كل وحدة تمسك لسانها ولا احلف ارجعكم ..
دلال بدلال : تقدر ترجعهم هم بس انا ماتقدر صح ؟!!..
بدر ابتسم لها وهز راسه بتأييد : ايه انتي ماقدر عليك ..
فرح : يكفي دلع يا بدر ترا بتاخذ وجه عليك ..
راحت دلال وهي تتبختر وشبكت ذراعها ببدر : احم .. خليني اخذ وجه .. مو اخوي .. ؟!!!..
نوف كانت جالسه بالسيارة ما تحركت ولا نزلت تشاركهم الفرحه .. وتسمع اصواتهم وضحكهم وهي مو قادره تنزل .. هي قالت لهم انها مارح تجي .. وش بيقولون لو شافوها ..
لما زاد عليها الصداع نزلت من السيارة وقررت تدخل مباشرة داخل ..
سهى فجأة تلفتت يمين وشمال تبحث عن نوف بينهم : وين راحت نوف ؟!!!!..
دلال تركت ذراع بدر : نوف ؟!!!.. هو نوف اصلا جت ؟!!!!..
سهى : ايه غيرت رايها وجت .. بس وينها وين راحت ؟!!!..
بدر من سمع اسمها مادرى وش يسوي .. كان مرتاح من عدم قدومها ، بس الحين زاد شوقه لمجرد احساسه انها قريبة منه ..
دخلت نوف داخل لقت امها ومرة عمها جالسين بالصالة .. كشفت عن وجهها وآثار عميقة من الدموع جلية بوضوح عليه .. لاحظت امها ملامحه ا الغريبة ونادتها ..
ام احمد : نوووف ..!!!
نوف كانت متجهه للدرج بتطلع لوحدة من الغرف فوق ، لفت لها : نعم يمه ..
ام احمد بخوف بصوتها : شفيك ؟!!..
نوف رجعت لها عبرتها وكل همها انها تهرب من الكل وتستفرد بنفسها طول اليوم : مافيني شي .. بس شوي تعبانه ...
ام احمد كانت جالسه قامت واقفه وقربت من بنتها ولاحظت دموعها بعيونها ، نوف ماقدرت تخبيها مع انها ماتبي احد يشوفها .. ونزلت عيونها ..
ام احمد : شفيك يمه وش اللي متعبك ؟!!..
نوف العبرة استقرت بحلقها وكل كلامها مكتوم : ما أدري يمه .. راسي يعورني وابي ارتاح .. ابي انام طول اليوم مابي احد يصحيني .. ابي امـوووت ..
ضربت ام احمد على صدرها بخوف وهي حاسه ان بنتها فيها شي : بسم الله عليك وش هالكلام .. وش حاسه فيه يمه ..
نوف وهي تلوح بيدها بملل : مافي شي يمه قلت لك بس صدااع .. وابي ارتاح ..
ام احمد : روحي ارتاحي يمه واذا جا وقت الغدا بنصحيك ..
نوف هزت راسها نفي وهي تلف وجهها بتطلع الدرج : لا يمه قلت مابي احد يصحيني ..ابي اكون نايمه لما نرجع للرياض ..
تركت امها وهي تسحب خطواتها عالدرج .. وصلت فوق واتجهت للغرفة المعتادة اللي تعودت تاخذها كل ما جو هنا هي ودلال ..
دخلت وسكرت الباب .. رمت عباتها أي كلام عالأرض ومباشرة رمت نفسها عالسرير ..

برا البنات واقفين مع بدر اللي بدا يسترجع ذكريات قديمة له بهالمزرعة الضخمة .. احلوت عن أول لأن مبين ان ابوه وعمه اشتغلوا فيه وعدلوا لما طلعوها بأبهى صورة ..
بدر وعيونه بعيد : تصدقووون اشتقت للبقر ..
ضحكوا البنات وهم يستخفون فيه .. هذا اللي هامه البقر !!!
فرح : هههههههههههههه .. بدر !!!.. هذا اللي جا ببالك .. البقر ؟!!!!... هههههههههههههههههه ..
بدرلف لها بنظرة مزدرية من طرف عيني : وانتي شعليك .. كان تذكرين في وحدة من البقر خويتي .. وربي اني اشتقت لها مدري عنها حية ولا ميتة .. احد منكم شاف أخبارها ..؟!!!
حنان باستنكار ضحكت : ههههههههههههههه .. اكبر همي بقرتك !!!.. اذا تبي تتطمن عليها روح زورها .. زين منها اذا انتظرتك ثلاث سنين وما تزوجت غيرك ..
بدر : اذا هي فكرت مجرد تفكير تاخذ غيري فهو اكيد ثووووور ..
دلال ماتت ضحك وهي فرحانه لرجوع ذيك الايام مع بدر : ههههههههههههههاي .. بالله بدر اكيد بيكون ثور أجل وشو آدمي .. !!!... ههههههههههههههه ..
بدر لف لأحمد مبتسم : احمــد تعاااال معي نزور خويتي .. وأعرفك عليها ..
احمد تراجع بخطواتها وهو يرفع يده بانسحاب : لااااا روح لخويتك لحالك .. تعرفني ما أطيق البقر ولا أطيق ريحتهم ..
ولف عنهم متجه لداخل وهو يتمتم بصوت مسموع : بعد هذا اللي ناقصني اروح أتعرف على بقر !!!!!!
تبعوه بعد شوي وبدر راح عند ابوه وعمه والبنات دخلوا للصالة .. ودلال باستغراب قلبت عيونها بالأنحاء والتفتت لسهى : سهى مو تقولين نوف جت ؟!!!.. وينها ؟!!!..
سهى لفت لأمها وعيونها تسأل ..
ام احمد : طلعت فوق ترتاح .. تعبانة بعد عمري ؟!!!..
دلال بضيق : وهو هذا وقته عشان تتعب ... جايين عشان نستانس وننبسط وهي تتعب ..
فرح خزتها بنظرات فيها شوي من الحدة : دلال هو التعب يستأذن قبل لا يجي الواحد .. استحي شوي وش هالكلام ..
دلال ما اهتمت ولفت عنهم تركض لفوق : انا بروح اشوفها .. هذي اللي مهي جاية أوريكم فيها ..
اندفعت فوق ومباشرة مثل الصاروخ اقتحمت الغرفة على نوف وهي تصفر ..
دلال : كل هذا تغلي .. وين اللي قالت مارح تجي .. بس الغلا الزاااايد مشكلة ..!!!
نوف ما تحركت غير أنها تأففت ..
دلال : نوف أي تعب هذا قومي كله دلع .. والله الجو برا جناااااااان قومي ..
نوف : دلال مالي خلق احد خليني مابي اروح لأي مكان ومابي أطلع ..
دلال باصرار راحت وفتحت باب بلكون الغرفة الصغير : لا لا لا لا لاااازم نصير كلنا قروب البنات كامل .. قومي تعرفين البسطة من غيرك ما تكمل ..
نوف بضيق وهي تغطي وجهها وتصرخ : انبسطوا محد مانعكم من شي .. اما انا مالي خلق لأي شي خلوووووني لحالي ..
خافت دلال من صراخها وتراجعت وطلعت من الغرفة وهي مستغربة ..


اما نوف ظلت على حالها عايشة بزوبعة من الأفكار والتساؤلات والأحاسيس .. كلام ندى لمس الوتر الحساس عندها .. لو أعرف وش كنتي تقصدين بالضبط يا ندى .. خليتيني اعيش الحين بدوامه مو فاهمه وش اللي حولي ..
تحركت نوف وهي تغطي نفسها بشكل كاااامل بدون ماتسمح لخيط نور واحد يدخل عليها .. لكن مافي فايده .. الأضطراب اللي عايشته حرمها النوم بهاللحظات ..!!..
قامت من السرير وطلعت للبلكون ووقفت عالشرفه .. وقلبت بعيونها بالأنحاء والجو مع لفحة الهوا كان روعة مثل ماقالت دلال ..
غمضت عيونها بهدوء تسمح للهوا يتخلل شعرها وينثره بكل نعومه ودلال ..
فتحت عيونها بنفس الهدوء وطاحت على شخص ما توقعته يظهر لها بهالوقت بالذات .. كل ماحست انها بدت تتناساه رجع يظهر لها او أي شي يذكرها به ..
كان بدر واقف تحت بسكون ومعطيها ظهره ، ويديه بجيوبه ومبين عليه التفكير والسرحان والتأمل بالكون من حوله .. نوف ما تحركت ظلت فوق تطالعه ورجعت ذات الأفكار تداهمها ..
فجأة سمعت صوت اخوها احمد من داخل ينادي بدر .. بدر لف بيرجع لداخل وبالصدفة ارتفعت عيونه فوق وشافها ..!!!..
جمد مكانه من صدمته ، وأمنيته اللي كان يتمناها من لحظات تحققت مباشرة .. كان يتمنى يشوفها بس ماتوقع انها تتحقق بهالسرعة الرهيبة !! .. وقف مكانه وعيونه عليها .. اما نوف شهقت وتراجعت خطوتين للخلف ويدها على قلبها ورعشة غريبة تسري بجسمها كله ..
بعد لحظة من الزمن .. رن جوالها بمسج ..
ولما فتحته كان من بدر ..
" شفت الشجر ؟ صوته مع الريح وشلون ؟ هذا حنيني يطلبك دوم بالصوت "
مسج قصير بكلمات بسيطة لكن نوف ما تدري ليش حست انه غير عن كل المسجات .. يمكن لأنها حست فيه الصدق وخاصة انه يناسب المكان اللي جالسه فيه ..
قفلت المسج وبحذر رجعت تتقدم بخطوات بطيئة حذرة تبي تطل وتشوف اذا كان راح أو لا .. لكنه لازال بمكانه وعيونه لفوق .. انتبه لها ثاني مرة وهي تراجعت بخوف اكبر من الأول ..
دق جوالها مسج ثاني مرة .. وكان من بدر بعد ..
" رغم جفاف الندى ما تيبس أزهارك .. يا حب وصدق ووفـا وحشتـني أخبارك "
نوف قفلت المسج ورجعت دموعها تتدفق لعيونها من هالأسئلة اللي مو لاقيه لها جواب .. حاولت تتراجع ببطء للغرفة عشان تقدر تنثر همومها هناك على راحتها الا انها اصطدمت بظهرها بباب البلكون خلفها .. ولأن كل قواها خارت وتلاشت مع الهوا والنسيم .. جلست عالأرض وهي مستندة عالباب ، وضمت الجوال بيديها الثنتين .. وبكت بصمت .. ليش يبي يضغط علي .. وش ناوي من هالكلام كله .. وش يقصد بالضبط ..؟!!!!..
وما اكتفى بدر بهالمسجين ، وأرسل مسج ثالث ..
" إن نمت أحلم فيك .. وإن سرحت أفكر فيك .. وإن زعلت حنيت أبيك .. بصراحة أموت فيك "
خلااااص يكفي اللي فيني .. لا ترسل كفايه ابي افهم اول شي كل اللي صار ..
نكست نوف راسها على ركبتها وهي تعاني من ضغووط نفسية .. وعاطفية أقدر اقول .. كانت بمرحلة انها تحاول تصدق شي هي نفسها مو راضيه تصدقه ..!!!..
وبعد هالمسج جت الصدمة التالية .. دق جوالها هالمرة بمكالمة ..
" أكرهه يتصل بك " ..
طالعت الاسم .. هل انا اكرهه فعلا ؟!.. ولا وش اللي يصير لي ؟!!.. احد يقولي تكفووون ؟!!!..
ضغطت بأصابع مرتجفة على رفض الاتصال ودموعها سالت معها..!!!.. ماتبي تكلمه ولا تبي تكلم أحد !!!!..
وبعد مارفضت الاتصال وصلها مسج رابع ..
" لمحة زعل من عيونك تموتني بلا عله .. وبسمة رضا من شفاتك تعيشني العمر كله "
كان بدر يضغط عليها بهالمسجات المتواصله بشكل هي مو قادره تتحمله .. وكأن بدر يبيها تفهم شي بالغصب ..
نوف مسكت راسها بألم من الصداع اللي ما هدا من وصلت هنا ، وكتبت له مسج من كلمه وحده " كفايه " .. وأرسلتها ..
لكن بدر بدال ما يكفّي ويستجيب لها أرسل مسج يبين اصراره ..
" القلب لك ينادي والروح بعدك سراب كل الوجوه تغيب عادي وأنت غيابك عذاب "
وبعدها مباشرة عاود الأتصال .. " أكرهه يتصل بك " ..
لكنها ماتحركت تعلقت عيونها عالاسم تنتظره يقفل .. مو قادره تضغط على زر الرد .. ماتبي تسمعه لأنها الآن منقلبة ومضطربة داخليا .. وتخاف صوته يقلبها أكثر وهي مو متحمله أكثر من كذا ..
سكت الاتصال أخيرا وتبعه مسج " نوف ردي علي أبي أكلمك " ..
نوف ظلت تقرا المسج أكثر من مرة .. يبي يكلمني ؟!!.. وش يبي مني ؟!!!..
نوف " وانا مابي أكلمك .. خلني لحالي " ..
بدر " ردي أبي أقولك شي " ..
نوف " بدر انا تعبانه مابي أسمع شي .. وتكفى لا تحاول تدق علي ولا تحاول ترسل أي شي " ..
بعد هالمسج قفلت جوالها ، وبعد محاولة قدرت توقف بمساندة الباب خلفها .. دخلت الغرفة وسكرت باب البلكون ..
ورجعت تسترجع كل شي يعذبها ..

بدر لازال بالأسفل يفكر بالتصرف اللي كان مقدم عليه .. لو انها ردت عليه كان مافي شي رح بوقف بوجهه .. اكتفى كتمان بقلبه لازم يطلعه ولو كل العالم عرف .. مايهمه .. !!!
رجع صوت احمد يناديه من داخل وراح وهو كل تفكيره صوب نوف ..


في بيت ابو فهد .. ندى بعد عدة ايام غياب عن طلال هذا هو رجعت تقابله بالنت بعد مالقته اون لاين .. كانت للحين مستغربة وتسأل نفسه عن زعله المفاحئ ذاك اليوم ..
فضلت انها ماتبدا بالسلام هي .. اذا سلم هو بترد عليه واذا ماسلم مارح تكلمه .. اخذ وقت طويل ما تكلم فيه لكن بعد فترة تكلم ..
طلال " مساء الخير " ..
ندى " مساء النور " ..
طلال " كيف الأحوال " ..
ندى " تمام " ..
فترة من الصمت من الطرفين ..
طلال " شفيك ؟!.. لايكون زعلانه مني ؟ "
ندى " انا اللي زعلانه ولا انت اللي زعلان !! "
طلال " سامحيني .. ماكان حقي اني ازعل .. " ..
ندى " طلال انا خبرتك من قبل على أي اساس بتكون علاقتنا .. وخبرتك قبل اني لسا طالعه من تجربه فاشله ومو مستعدة أدخل بجديدة " ..
طلال " أدري أنا آسف غناتي " ..
ندى " مسموح بس بليز لا تفكر فيني بشكل بعيد ن الواقع ومستحيل يصير " ..
طلال " ليش مستحيل يصير " ..
ندى " طلال اكيد مستحيل يصير .. انا ماعرفك ماغير بالنت ومستحيل ادخل بعلاقه تكون من النت .. وانت بعد ماتعرف غير اسمي واشياء بسيطة عني " ..
طلال " وكل اللي عرفته عنك تعتبرينها اشياء بسيطة ؟! " ..
ندى " تعتبر اشياء بسيطة اكيد .. ومستحيل تقوم عليها علاقة قوية " ..
تحت بالصالة نايف وشوق عالبلاي ستيشن والتحدي قايم ..
نايف المتخذ دائما دور العاشق الولهان : حبيبتي خليني افوووز ترضين كذا حبيبك ينهزم ..
شوق بدلع تبادله الدور : وش اسوي فيك حبيبي انت مو راضي تشغل مخك .. بلا غبااااء وشغل هالمخ اللي مو راض يشتغل ..
نايف : افا والله افا .. تتمصخرين على حبيبك نيوف .. افا والله ماهقيتها منك ..!!!
شوق تضحك ومتحمسة باللعب .. لما جاهم عمر وضارب نايف الا يبي يلعب شوط مع شوق ..
نايف وهو يلتفت لشوق يطلب نجدتها : شوووق قوليله مافي ..
شوق هزت راسها بالنفي : نو نو نو .. عاد عمر الحبيب حقي نمبر ون .. محد يقدر يقوله شي .. صح عمر ؟!!..
عمر هز راسه بحماس ورجع يضارب نايف يبي ياخذ دور ..
نايف استسلم بخيبة أمل : الحين صار عمر الحبيب نمبر ون .. وانا وين رحت ..؟!!!.. اجل انا اعتزل حبك معد أبيك .. !!
تضحك شوق وتعطيه نظرة ، ونايف بتصنع مسك قلبه : ياويلاااااااه تذبحني هالنظرااات !!!!..
شوق : بس انطططم عطيتك وجه ترا .. وخل حبيبي نمبر ون يلعب يالله .. انت خسرت حوالي عشر مرات .. يمكن عمر يكون احسن منك ..
- مين الحبيب نمبر ون ؟!!..
وصلهم صوت فهد من وراهم .. وشوق جمدت وسكنت تمااما ... الحبيب الحقيقي وصل !!!...
نايف اللي قام من الأول وجلس عالكنب ينتظر انتهاء دور عمر لف فهد : الله يسلمك الحبيب نمبر ون هو عمر .. وانا الحبيب نمبر تو .. والله يستر منهو الحبيب نمبر ثري ..؟!!!!
فهد بعفوية : يمكن انا !!!!...
شوق احمررر وجهها ومسكت ضحكتها رغم احراجها .. اما نايف عفس وجهه بسخرية ..
نايف : لا تستبعد .. مو هي صفّت كل عيال عمها وخلتهم حبايب ..!!!..
قفطت شوق وطاااااح وجهها وتحسبت على نايف بسرها .. الله ياخذ عدوك .. هذا كلام ينقال عند فهد ؟!!!!..
فهد لف لها بابتسامة حلوة وهي للحين معطيته ظهرها وما تحركت من مكانها : وانا .. رقم كم عندك ؟!!!..
شوق تبخرت الكلمات من حولها .. مو عارفه شلون ترد عليه .. وربي انه جرئ دواه من يرجمه بالشبشب اللي علي ..!!!
ماردت شوق وظلت تلعب من عمر اللي ناسي الي حوله .. وفهد ضحك وأعااد السؤال : ها ما قلتي ؟!!!..
ماردت وظلت تلعب وقلبها داخلها يخفق بشدة ..
فهد تبدلت نبرته للهدوء التام : مو أكيد .. الحب مو هنا الحب بالشرقية ..
شوق فتحت عيونها ولفت له بدون شعور وهي مو فاهمه وش مغزى كلامه بالضبط .. الحب بالشرقية !!!!!!!..
شوق بصوت اشبه بالهمس : وش تقصد ؟!!!..
فهد : ما أقصد شي .. واذا اقصد شي انتي اكيد فاهمته ..
تركت شوق اللعبة من يدها وعطت فهد كل انتباهها : انا فاهمته ؟!!!.. ممكن تفهمني !!!..
فهد : لا تستغفليني انتي فاهمه بالضبط وش اقصد ..
طالعته شوق بقهر .. يا الله وش قد هو عنيد اقوله مو فاهمه يقول الا فاهمه ..
دق الجرس وقطع عليهم نقاشهم .. ونايف طاار للباب يشوف .. وبعد دقيقة رجع يدخل ووجه معفووس واشر لشوق لوراه بإشارات ما فهمتها ..
شوق سألته بالإشارات نفسه بس دخول البنت خلاهم يسكتون ويطالعونها كلهم ..
مها : السلام عليكم ..
شوق + فهد : وعليكم السلام ..
شوق مباشرة راحت لها مبتسمة وسلمت عليها : اهليـن مها منورة ..
مها من ورا قلبها : هلا بك .. اخبارك ؟!!..
شوق : تمام الحمدلله .. تفضلي ارتاحي .. كان اتصلتي قبل عشان نستقبلك زين ..
مها تمتمت بصوت مسموع : اللي يسمعك يقول البيت بيتك !!..
شوق صدمها اللي سمعته .. وفهد بعد سمع اللي قالته وضايقه ..
فهد بنبرة جافة شوي : اذا هذا مو بيتها اجل وين بيتها ؟!!..
مها لفت لفهد مصدومة من نبرته .. وفهد طالعها بنظرة تسم : المفروض تحترمين راعية البيت باللي فيه .. عيب هالكلام ..
شوق صدمتها الثانية جت من فهد .. رد عليها رد قوي .. يمكن كلام مها قوي بعد بس المفروض فهد يخفف من حدة نبرته شوي .. مهما كانت هي حلت عليهم ضيفة ..
مها تحت تاثير صدمتها : آسفة ماكنت أقصد ..
فهد توه بيتكلم ويرد قاطعته شوق : معليش حصل خير تفضلي مها ..
وفهد ماهمه اللي قاله مشى ناحية الباب بيطلع .. وبهاللحظة دق عليه رقم غريب .. ومها لفت له بنظرة غريبة .. فهد طالع الرقم يحاول يتذكره .. مر عليه هالرقم من قبل ..
وقف بمكانه ند الباب ورد : الوو ..
- اهليـن فهد ..
فهد قطب وهو يتذكر الصوت .. هالنبرة كلمته من قبل ومن فترة .. : نعم ..!!
- ماتذكرتني ؟!!..
فهد بسخرية : لا والله ما أتشرف ..
شوق انتبهت لنبرته ولفت له تسمع للي يقوله ..
- تذكر أول مرة اتصلت لك فيها .. لما سألتني شلون رقمك وصلني .. معك بدور اذا تذكرني ..
فهد ابتسم بسخرية لما تذكرها .. بس انا أعلمها من يكون فهد : لا ما أذكر ولو حتى اذكرك انصحك ما تتصلين على هالرقم ثاني مرة ..
بدور : هد اعصابك ترا ما نستاهل هذا كله .. انا بس ابي أتعرف ..
فهد : روحي تعرفي على غيري .. انا ما أتشرف ..
بدور بصدمه ماتوقت كذا يكون رده : طيب هد شوي خلنا تنفاهم .. انا ابي اتعرف عليك يافهد ..
فهد باحتقار : لا تجيبين اسمي على لسانك .. وانا قلت لك ما اتشرف واحذرك تدقين على هالرقم ثاني مرة ..

قفل بوجهها .. خلها تعرف مو فهد اللي يركض ورا البنات .. غلطت لما سكرت تلفون ذاك اليوم وماعلمتني من وين حصلت الرقم .. غلطانه اذا كانت مفكره اني بركض وراها ..
مها اللي كانت مخططه لهالشي مسبقا مع بدر صدمها اللي صار واللي سمعته من رد لفهد .. وشوق استغربت .. من كلامه مبين انها بنت من البنات ... وفهد صدها !!!!!!...
طلع فهد من البيت وضلت شوق مع مها بالصالة .. ولأن مها بين ان مزاجها تعكر وانقلب فوق تحت فضلت شوق ان تطلع تنادي ندى لأنه مو مستعدة تقابلها لحالها ..
بغرفة ندى ..
ندى بتساؤل : مها تحت ؟!!!..
شوق : ايه .. انا استغربت جيتها بصراحه ..
ندى : غريبة ما اتصلت علي عشان تقولي ..!!
شوق : انزلي انتي تعرفين تتعاملين معها اما انا افضل اني ما احتك فيها ..
ضحكت ندى : هههههههههههه .. وش بتسوي يعني بتاكلك .. ماعليك منها خلك قوية كلللش ولا شوق عااد ..
شوق : ههههههههه روحي لها لا تعصب من جد ..
نزلوا مع بعض ومن المفاجأة لقوا الصالة خاليه ، الا من نايف اللي رجع يلعب بلاي ستيشن كعادته ..
تلفتوا شوق وندى بالصالة يدورونها لكن مالقوا احد ..
شوق لفت لنايف مستغربه : وين مها راحت يا نايف ؟!!!..
نايف وعيونه على لعبته : رجعت لبيتهم ...
شوق ما استوعبت : هاه !!!... رجعت ؟!!.. توها جايه الحين امداها ..
نايف : مدري عنها ... من طعتي فوق طلعت حتى بدون سلام او كلام .. بيني وبينكم احسن .. انا هالبنت ما اهضمها مع اني ولد بس ما أدري ليش احسها ثقيييييييييللللللللللة ..
ضحكت شوق .. حتى انت بعد .. يعني مو انا لحالي ..
ندى بضيق : وربي انها قليلة ذوق .. طيب تنتظر عشان تسلم او تقول انها بتروح .. مو كذا تروح وبس بدون كلام ..
نايف بعدم اهتمام لف لشوق : تعالي بس كملي مع حبيبك نمبر تو .. حبيبك نمبر ون راح ياكل فكككككككككه ..
شوق ضحكت وراحت جنبه : الا عاد حبيبي نمبر ون لا تقول عنه شي ترا ما أرضى عليه ..
نايف بثقل الرجال : افا والله كذا تزعليني .. عالاقل جامليني ..

بالمزرعة .. طلع احمد من الفلة وراح لسيارته يدور على جواله لأنه الظاهر ناسيه هناك .. الشمس قربت تغرب والجو جناااان نقي وبارد ومنعش .. وصل سيارته ولقى الجوال بمكان مايحطه هو دايما .. وقبل ما يطلع من السيارة لفت نظره دفترندى .. ورجعت له صدمته اللي للحين ما تشافى منها ..
صار هالدفتر دايم معه واغلب الأحيان بكون بسيارته .. من فترة لفترة يرجع يفتحه ويقرا اللي فيه .. ويزيد تصديق ان ندى حبته في يوم من الايام .. لكن السؤال واللي مسبب له حيرة هل ندى الى الآن تحبه أو لا .. من مكالمة التلفون قالت انه خلاص نسته وزيادة عالمكتوب بصفحات هالدفتر بين ايديه ..
لكن احمد داخله مو مصدق .. المكتوب يتكلم عن حب كان صادق وقوي ومتأصل بندى من طفولتها .. معقولة بهالسرعة الانسان ينسى ؟!!!!..
جلس احمد بداخل سيارته وقفلها علىنفسه عشان يخلو بنفسه شوي ويقدر يفكر بهدوء ورزانة .. ويقدر يوزن الأمور .. طاري ندى الحين لحاله صار يسبب له اضطراب ..
زيادة على التأنيب اللي ملازمه من عرف بالحقيقة كلها .. بنت خالته عانت وتألمت كثــير وهو مو داري عنها ..
صار يذكر الحين كل المرات اللي حاولت تقوله فيها شي .. بس ما توقع وقتها انها بتقوله " أحبـك " .. عمره ما تخيل ان ندى بتقوله هالكلمة بيوم من الأيام ..!!!!
والحين قاعد يفكر عشان يتصرف بطريقة سليمة ، ويقدر يسترد ثقة ندى فيه مثل ما وثقت فيه من قبل ..!!!..
بالمزرعة .. طلع احمد من الفلة وراح لسيارته يدور على جواله لأنه الظاهر ناسيه هناك .. الشمس قربت تغرب والجو جناااان نقي وبارد ومنعش .. وصل سيارته ولقى الجوال بمكان مايحطه هو دايما .. وقبل ما يطلع من السيارة لفت نظره دفترندى .. ورجعت له صدمته اللي للحين ما تشافى منها ..
صار هالدفتر دايم معه واغلب الأحيان بكون بسيارته .. من فترة لفترة يرجع يفتحه ويقرا اللي فيه .. ويزيد تصديق ان ندى حبته في يوم من الايام .. لكن السؤال واللي مسبب له حيرة هل ندى الى الآن تحبه أو لا .. من مكالمة التلفون قالت انه خلاص نسته وزيادة عالمكتوب بصفحات هالدفتر بين ايديه ..
لكن احمد داخله مو مصدق .. المكتوب يتكلم عن حب كان صادق وقوي ومتأصل بندى من طفولتها .. معقولة بهالسرعة الانسان ينسى ؟!!!!..
جلس احمد بداخل سيارته وقفلها علىنفسه عشان يخلو بنفسه شوي ويقدر يفكر بهدوء ورزانة .. ويقدر يوزن الأمور .. طاري ندى الحين لحاله صار يسبب له اضطراب ..
زيادة على التأنيب اللي ملازمه من عرف بالحقيقة كلها .. بنت خالته عانت وتألمت كثــير وهو مو داري عنها ..
صار يذكر الحين كل المرات اللي حاولت تقوله فيها شي .. بس ما توقع وقتها انها بتقوله " أحبـك " .. عمره ما تخيل ان ندى بتقوله هالكلمة بيوم من الأيام ..!!!!
والحين قاعد يفكر عشان يتصرف بطريقة سليمة ، ويقدر يسترد ثقة ندى فيه مثل ما وثقت فيه من قبل ..!!!..

الجــــــــــــزء 30




ثناء الغروب .. وبعد غفوات متقطعة من النوم .. نوف تتقلب بضيق وهي مو قادره تنوم براحه .. تسمع أصوات الكل يوصلها من البلكون .. اصوات ضحك ولعب ووناسة ..
اما هي مو حاسة بأي شي من هالأحاسيس .. تبي تفرح بس مو قادره .. تبي تضحك بس مو قادره ..
لما زادت اصواتهم وضحكاتهم حست بالفضول انها تعرف وش يسوون وليش كل هالضحك الواصل لآخر الدنيا ..
قامت من السرير وطلعت للبكلون ، وطلت عليهم .. شافت مثل ما توقعت بالضبط .. البسمة على شفات الكل والضحكة ما توقف منهم ..
بدر كان ماسك بيده حبل مربوط برقبة بقرة ويجرها لحد الفلة .. والبنات يهربون مبتعدين عنها ويقفون بعيد وهم يضحكون ..
فرح تصارخ لبدر : هههههههههههههه .. بدر ليش جبتها رجعها لمكانها .. يممممممه والله تروووع ..
بدر وهو يحط يده على ظهر البقرة ويبتسم للبنات : هذي خويتي اللي كلمتكم عنها .. شرايكم فيها ..
دلال ميتة ضحك : قبيححححححة دور لك احلى منها .. ( وتمسك انفها بأصابعها ) .. حرام عليك يابدر والله ريحتها كريهه رجعها بتخيس الفلة علينا ..
بدرعناد فيهم وبكلامهم ، انحنى على البقرة وطبع بوسة على جبينها .. والبنات من شافوا المنظر علت أصواتهم بالقرف والاستنكار ..
البنات وهم يغضون بصرهم عن المشهد : ياااااااااااااااع ..!!!!!!!
بدر رفع راسه بسخرية : شعليكم انتوا بقرتي وعاجبتني ..
نوف وهي تراقب المشهد ، من غير شعور ضحكت ومسكت فمها بيدها وهي تشوف بدر .. كانت أول مرة تبتسم طول هاليوم اللي مر عليها ..
طلع احمد من الفله وتفاجأ لما شاف البقرة القابعة قبال الباب .. وطالع بدر بصدمة ، وبدر يشوفه باستخفاف ..
احمد منقرف : تكفى رجعها لا تخليها هنا .. وانا اقول وش هالريحه اللي واصله لنا لداخل ..
بدر بعباطة : شفيها ريحتها ؟!!!.. عطر شانيل شانس ..!!!
البنات صرخوا باستنكار وهم يتقرفون ويضحكون بنفس الوقت ..
فرح : بدر تشبه العطر بريحة هالكريهه .. ( وتأشر عالبقرة بقرف ) ..
نوف كانت تضحك فوق ومحد منتبه لها .. والله حلو يعرف بالعطورات !!!..
كان بدر لافت نظرها .. لبسه كان لبس الكاوبوي ( cowboy ).. وطبعا مع قبعة الكاوبوي الخاصة اللي عطته انطباع خاااص وهيئة بعيدة عن هيئته الأولى .. هاللبس شراه من الخارج لما كان برا ، وجت الفرصة انه يلبسه اليوم .. ومايحتاج اقولكم وش قد كان شكله جذاب بهاللبس .. وكأنه فعلا رجل كاوبوي ..
أول ماظهر على اهله بهاللبس ابدوا اعجابهم واستعجابهم .. ودلال لحظتها ماصدقت راحت له وضمته ..
دلال بحضنه : يااااااويلي .. مو ناقصك غير تدخل بوحدة من أفلام الهوليوود ..!!!..



نوف وهي تتأمله من فوق تملكها احساس برغبة انها تشوفه بالخيل .. هذا الشي اللي نقصه خيل أسود وتكتمل الصورة ..!!!
وكأن حنان قرت اللي بخاطرها وتكلمت : اقوول بدر .. نصيحة مني رجع هالبقرة واذا تبي تجينا تعال بخيل أحسن ..
دلال ايدت : ايه صدق روح وتعااال بحصان .. ياااااي ماقدر أتخيل شكلك ..
بدر عفس وجهه ونزل راسه يتأمل نفسه وملابسه .. هل أنا فعلا شكلي كاوبوي لهالدرجة ..!!!.. بدر ما كان يشوف نفسه كاوبوي ويحسبهم يبالغون فكان يجاريهم .. بس الحين بدا يقتنع ..
بدر لف لأحمد بيسأل : اقول احمد .. انا خبري كان عندنا خيلين اثنين بس .. للحين موجودين ؟!...
احمد : ايه اظن .. ما سمعت انهم باعوها او شي .. بتلقاهم بمكانهم ..
بدر ابتسم للبنات وهو يلف ويجر البقرة معه : احم احم .. انتظروا الفارس الكاوبوي بدر ..
فرح باستغراب نادته : تعاااال .. اخاف تطيح وتتكسر علينا .. لك وقت طويييييييييل ماركبت الخيل ..
بدر بنظرة واثقة : لا تشيلين هم .. just wait..
غاب بدر عن عينهم وابتعد والبقرة معه .. وظلوا ينتظرون الفارس ( على قولته ) يظهر لهم .. اما نوف ماتدري ليش تحمست تشوفه وكانت أكثرهم لهفة انها تشوفه بهيئته الجديدة بالخيل ... بدل البقرة !!!!!!..
بيكون فيه فرق اكيد بين بدر اللي يجر البقرة خلفه .. وبدر الراكب على ظهر الخيل ..!!..
بيكون فيه فرق مثيـر !!!
على حسب علمها كان بدر يركب الخيل هنا لما كان عمره 14 او 15 سنة وبعدها انقطع .. يعني بيفقد مهارته .. بس مبين عليه الثقة بنفسه وهو يتكلم قبل شوي .. بنبرة واحد معتاد وواثق من اللي بيسويه ..!!!
غربت الشمس تماما وحل الليل وطلعت النجوم ، وانفتحت الانوار حول الفلة وبدر للحين مارجع !!.. والكل يعلق ويتخيل وينتظر ظهوره ..
احمد رجع داخل وهو يضحك .. وهو عارف سبب تأخره ..!!!
وبقوا البنات برا ينتظرونه .. مرت نص ساعة والفارس للحين ماشرف .. وبدوا يخافون عليه لايكون صار له شي ..
ومرت الدقايق دقيقة ورا دقيقة وزاد خوفهم من تأخره .. ودلال التفتت عالبنات والقلق بعيونها ..
دلال : شفيه تأخر ليكون صار له شي وتعور !!!..
فرح رفعت جوالها بتتصل : بتصل فيه بشوف ..
واتصلت .. ونوف الواقفه بمكانها وتسمع لكل كلامهم ، تسلل القلق لقلبها من غير شعور .. وما انتبهت لنفسها ان اللي بدت تقلق عليه الحين يصير عدوها .. عيونها تطالع فرح اللي ظلت تمشي رايحة وراجعة والجوال باذنها تتنتظر رد .. وخاب ظنها لما نزلت الجوال والتفتت للبنات : ما يرد ..

حنان : طيب نروح هناك نشوف ..
فرح وهي تفكر : ما أدري المكان بعيد ننتظر شوي يمكن يجي ..
وانتظروا دقيقتين ، وبعدها دلال معد طاقت الانتظار وقامت واقفة بعد ماجلست من التعب : انا بروح اقول لأبوي .. اكيد صاير له شي ..
وما انتظرت احد يعارض ولفت تهرول لداخل .. لكنها وقفت عالباب لما سمعت صوت غريب والتفتت للخلف والبنات التفتوا معها .. ونوف سمعت هالصوت ورفعت عيونها لبعيد تشوف ..
تكرر الصوت البعيد وهو يقرب بالتدريج .. صوت صهيل الخيل وصوت عدْوه السريع عالأرض .. البنات ضحكوا لما شافوا الفارس بدر راكب على ظهره والبسمة على شفاته .. ونوف بتلقائية تنهدت بارتياح ..
وصل لهم وبمهارة فائقة وقف الخيل بحركة اللجام في يده وبطريقة فارس بارع .. وبحركة مسرحية خلع قبعته وحياهم بها ورجعها على راسه ..
خواته وسهى طالعوه بعدم تصديق .. وكأن بدر ماترك الفروسية لسنين بحياته ..
حنان : بدّوووور .. لا اله الا الله للحين تعرف للخيول .. وكأنك ماتركتها لسنين !!!..
بدر بخيلاء : ومن قالك اني تركتها اصلا ..
دلال : اجل شلون لك زمان ما جيت هنا ..
بدر مثل الإلهام حل عليه وحس بشعور داخلي ان نوف قريبة منه وتراقبه .. رفع عينه بعفوية مصطنعة للشرفة فوق : انا ماانقطعت عنها لما كنت برا .. دخلت بنادي فروسية مخصووص عشانه ..
نوف لما شافت عيونه ترتفع لها تراجعت وجلست عالأرض ، مع ان الظلام حل بس خافت من نظراته الغريبة اللي تقول انه قادر يشوفها ..
فرح بدهشة : والحين توك تقوول !!.. ليش ماقلت لنا من قبل !!!..
بدر حس بنوف ، وبعدم اهتمام رد على فرح وقلبه طار فوق لها : ماكان فيه فرصة وشفت انه ماله داعي اقوول .. ( ونزل عينه لهم وابتسم ) .. يالله شرااايكم الحين وكأني كسبت التحدي ..
حنان : ايه والله عيني عليك باردة .. احسن من بقرتك الكريهه ..
فرح بعد ماتذكرت : ايه تعاااال ليش تاخرت خليتنا على اعصابنا والله حسبناك تعورت ولا صار لك شي .. انا شكيت انه مقلب منك تبي نخاف عليك .. بس حسيت جد صار لك شي ..!!!
ضحك بدر وانتبه لدلال تقرب منه : بدر .. ودي اركبه .. ودي اجربه ولو مرة ..
بدر ابتسم بحنية ومد لها يده : ابشري .. عطيني يدك ..
مدت دلال يدها له بكل حماس ، وبدر بسهولة قدر يرفعها ، وجلّسها أمامه ..
فرح بسخرية : دلووول ترا بتطيحين وتتكسرين ..
بدر وهو يلف بالخيل ويمشي بعيد عنهم : لا تخافين عليها دامها معي ..
دلال تودع البنات بيدها وهي تضحك : يالله اشوووووفكم بعدين .. هههههههههههههههه .. ( وتلف لبدر وبصوت مسموع ) .. بدر خلني اقهرهم ..
وابتعدوا وسمعوا معه ضحكة بدر على كلام اخته ..
فرح لفت لحنان وسهى : خلونا ندخل نصلي .. اكيد بيتأخرون دام دلال هاللي معه

دخلوا داخل ..اما نوف سمعت كلامهم ولما حست بسكون المكان وقفت بهدوء وطلت .. مالقت احد .. فرجعت للغرفة تصلي وهي تفكر بنظرة بدر الغريبة اللي عمرها ماشافتها .. بدر تغير عليها بشكل كبير أكل قلبها من الحيرة !!
وبعد ما خلصت من الصلاة دخلت عليها سهى مبتسمة : البنات يبونك نوف وامي ومرة عمي يسألون عنك .. تعالي يكفي جلسه بالغرفة ..
نوف رجعت السجادة مكانها وراحت انسدحت بالسرير : مابي انا قلت بجلس هنا لما نرجع للرياض ..
سهى : بالله يعني !!!.. بتحبسين نفسك بالغرفة يومين .. بتملين ..
نوف غمضت عيونها وسكتت ..
وسمعت سهى صوت امها تناديها وتنادي نوف .. ولفت لاختها : نوووف امي تنادينا ..
نوف تأففت وسهى راحت جرتها من يدها لما وقفتها ..
سهى وهي تسحبها : تعااالي الحين وخلي عنك العناد ..
نزلوا تحت وام احمد لما شافت نوف ابتسمت لها بحنان : ها يمه شخبار راسك ؟!..
نوف راحت وجلست جنب امها : الحمدلله أحسن .. ولو انه كل فترة يرجع يعورني .. بس احسن من الظهر اليوم
ام احمد : محتاجه لبندول اجيب لك..
نوف وهي تهز راسها نفي : لا مابي مايحتاج ..
فرح لفت لسهى وحنان : تعالوا نطلع .. الليل بهالمكان خياااالي .. قمر ونجووم وبس ..!!
نوف ابتسمت وفتحت عيونها : وين ندى بنت خالتي تسمعك .. سبحان الله انتي وهي نفس الطينه !!.. ليل وقمر ونجوووم .. وليالي شاعريه ..!!!
وضحكت بسخرية ورجعت غمضت عيونها تسترخي .. فرح ابتسمت وتنهدت : آآآآخ متى يوم زواجي عشان اروح اعيش مع اللي اختارني واللي رضا به قلبي ..
نوف ابتسمت بسخرية : نصيحة يا بنت عمي لا تستعجلين عالزواج .. تراه كله شهر عسل وباقي حياتك معه بصل .. لا تتفائلين بشي مستحيــل ..
فرح قربت منها وهي تتبختر بمشيتها وكانت تقصد تقول الكلام اللي انقال لأن نوف كان آخر اهتماماتها الزواج والحب ..
فرح : يكفي انه يحبك واختارك انتي من بد كل الخلق عشان يكمل حياته معك .. هذا بحد ذاته يكفي ..
نوف سكتت ولا ردت وظلت مغمضة عيونها ..
فرح : وبعدين انا الحين أُعتبر متزوجة وكلها اسبوعين ونص ويجي يوم الزواج واروح معه ..
نوف عشان تقفل الموضوع السخيف بالنسبة لها : الله يوفقك ...
فرح شوي تذكرت ندى بعد ما انذكر اسمها ولفت لمرة عمها : خالتي سارة ..
ام احمد : هلا ..
فرح : اممم .. ياليتكم عزمتوا ندى وشوق وخالتي ام فهد والكل ..
ام احمد : والله ما أدري .. ماجا على بالي لأني توقعت انكم تبونها عائلية ..
تدخلت ام بدر : وش دعوة هم بعد من الأهل .. ومعهم أكيد بتحلا الجلسه ..
فرح : ايه والله ياليت تكلمينهم ويجون عالأقل بكرة .. هالطلعة معهم ما تتفوت .. وآخر ايامي بالمزرعة قبل ما أتزوج .. ابي يكونون كل اللي احبهم موجودين قبل الزواج ..
ضحكت ام احمد : ههههههههههه .. ان شالله .. أدق عليها وأقولها ..
وخذت جوال بنتها سهى واتصلت على بيت اختها وردت عليها ندى ..

ندى : ياهلا ..
ام احمد : اهلين ندى .. اخباركم ؟!
ندى : هلا خالتي احنا الحمدلله .. ها شخبااار المزرعة ان شالله مستانسين ..
ام احمد ضحكت لان صوت ندى مبين عليها الحسافة : ههههههههههه الحمدلله ما نقصنا الا انتوا .. كأنك متحسفه لأنك مو موجودة ..
ندى : تبين الصراحة خالتوو ايه من قالت لي نوف وانا ودي اروح .. تعرفيني ما اقدر اكتم اللي بقلبي ..
ام احمد : يا بعد عمري وحنا بعد نبيكم .. وكل البنات وام بدر مصرين انكم تجون ..
ندى : متى ؟!..
ام احمد : يبونكم بكره من بدري .. بنجلس يوم ثاني هنا ..
ندى : انا عن نفسي ما عندي أي مانع .. بس ما أدري عن أمي ..
ام احمد : عطيني اياها اكلمها اذا هي عندك ..
ندى : ان شالله ..
نادت ندى أمها ، وبعدها طلعت فوق لغرفة شوق بس مالقت احد .. راحت لغرفتها يمكن شوق تكون هناك بس حتى غرفتها خالية ..
فجأة سمعت صوت ضحك عمر من غرفته الخاصة .. راحت له ودخلت غرفته الطفولية اللي كانت مليانه صور عالجدران ودمى وعرايس بكل مكان بالأرض .. عمر كان منبطح عالأرض وبيده قلم تلوين أزرق وشوق جنبه ..
ندى وهي تتقدم لهم : شوقووه يالبزر وش جالسه تسوين ؟!..
شوق تلون مع عمر وبدون ماترفع راسها : اللي تشوفينه ..
ندى تضحك بسخرية : خلي عنك التلوين هذا للبزران واكبري شوي ..
شوق مطنشه كلامها : اذا التلوين للبزران أجل انا مابي اكبر ..
عمر ترك اللي بيده ورفع راسه لأخته : خليها تلون معي .. انا أبيها تلون معي ..
ندى بعد ماعرفت ان شوق ماهي متحركه من مكانها جلست عالأرض وتربعت ، وسحبت لها وحدة من دمى الأرانب الموجودة حولها وحطتها بحضنها واستعدت تسولف وتقول اللي عندها : تدرين .. يمكن نروح للبنات بالمزرعة بكره ..
شوق رفعت عينها لها : أي بنات ؟!!..
ندى : نوف وسهى وبنات عمهم .. اتمنى من امي توافق ..
شوق : طيب مو ممكن نزعجهم .. يعني هم وبيت عمهم احنا وش دخلنا ..!!!؟
ندى : خالتي قبل شوي اتصلت وقالت انهم يعزمونا بكره .. آآآخ يا شوق انا متأكدة انك لما تشوفين هالمزرعة بتحبينها .. وخاصة اذا كنتي هناك مع بنات وناس تحبينهم ..
شوق مطت شفايفها بحيرة وهزت كتفها ورجعت للتلوين مع عمر : يمكن .. لكن انا يكفيني اعيش هنا لأنه هنا بعد في ناس أحبهم ..
تقصد فهد بكلامها .. واللي مر طيفه على خاطرها فجأة لاحساسها ان الحب يتأصل داخلها لحظة بلحظة تمر ..
ندى ابتسمت بخبث وشقاااوة : أيـــه أكيــد أنا ... انا عارفه انه انا اللي ناس تحبينهم .. مافي غيري ..
شوق تستخف فيها : لا مو انتي .. اللي يسمعك يقول انك انتي الوحيده بهالبيت ..
ندى تهز راسها وهي تقر : مع ذلــــك انا متاكدة اني المقصودة ..
شوق تضحك باستخاف وهي منزلة راسها تلون : مشكلة الثقة !!!!..
ندى بثقة عمياء بنفسها : مايحتاج تبينين حبك لي أكثر.. انا عارفه انك تستحين تقولين اللي بقلبك ناحيتي .. مع ذلــك انا فاهمه انك تحبيني وتموووتين علي بعد ..
شوق + عمر : يعععععععععع ..!!!
ندى فتحت عيونها وطالعتهم باستغراب !!!!!!!!!!!!!!!
شوق ضحكت ولفت لعمر : ههههههههههههه .. حتى عمر حبيبي فاهمني ..
عمر يلوح بيده في وجه ندى ويأشر عليها : انتي وعه وسوق حلوة .. ( ويقلب يده بفلسفة بريئة ) .. وسلون الوعه تحب الحلوة ؟!!.. ( ويلتفت لشوق ) .. وسلون ؟!!.. " وشلون "
شوق تهز راسها وتلتفت لندى المقهوووره : ايه صح وشلون يا ندى ؟!!..
ندى من قهرها رمت الأرنب اللي بحضنها بوجه شوق وقامت طلعت من الغرفة .. وشوق تضحك وعمر معها ..
ندى وهي رايحه لغرفتها سمعت امها تناديها من تحت ، وطلت من فوق : نعم يمه !؟!
ام فهد : ترا بنروح بكره من بدري ..
ندى بفرحة : وين ؟!

ام فهد : يعني ماتدرين .. خالتك قالت لك ولزمت علي ..
ندى : يااااااااااااااحبي لها خالتي .. اموووووت فيها ..
رجعت لغرفة عمر عند شوق : اوكي شوقوو استعدي بكرة بنرووح ..
شوق هزت راسها ومندمجة مع عمر ومو معطيتها وجه : اوخي .. ( اوكي )
رجعت ندى لغرفتها ومن فرط حماسها بدت تستعد وتحدد وش بتلبس ، وش بتاخذ معها من الحين .. اما شوق كانت تلون مع عمر وفكرها سارح لأبعد مدى وأبعد عالم .. ومو مركزة باللي جالسه تسويه .. لدرجة انها خلطت ودمجت ألوان غير متناسبة ابدا مع بعض .. وبدون ماتحس صارت تكتب بكل أرجاء الصفحة حرف الـ F .. وتتفنن بكتابته ..
وأثناء اندماجها باللي تسويه انتبهت على شهقة عمر ..
عمر وهو يطالع صفحة شوق : سوووووق .. حقتك وعـه مو حلوه !!!!
انتبهت شوق لنفسها وتأملت حروف الـ F والألوان الغير متناسقة وتمتمت : وع يا عمر من اللي سوا هذا كله ..!!!!
عمر طالعها بنظرة وكأنه يقولها يعني تستغبيني : انتي ..
شوق ضحكت على نفسها لما شافت نظراته : انا ؟!!!...
عمر عصب وسحب الدفتر .. لأن شوق شوهت صفحة من صفحات كتابه الجميل اللي يحبه ويموت فيه ..
عمر : ما تعلفين ..!! " تعرفين "
شوق ابتسمت وهي مستغربة من نفسها : انا آسفة بس حسبتها حلوه .. مادريت انها مو معجبتك ..
تبي تصرف عالموضوع وتجيب أي عذر .. بس عمر بين عليه الملل وطفش من التلوين .. وبدا يتأمل الحروف وأشر عليها : وث هذي ؟!!!..
شوق ابتسمت وهي خاطرها تكمل كتابة الأسم : حرف الـ F ..
عمر رجع يعصب : وليث تكتبينها هنا .. هذا حق ألوان بث ..
شوق : طيب آسفة ما أكررها ..
كان ودها فعلا تكتب بقية الأحرف h .. a .. وبعدها d .. بس اذا سوتها عمر بيذبحها .. ورجعت لسرحانها ثاني مرة تفكر باللي صار بينها وبين فهد اليوم العصر .. والكلام اللي قاله كان فيه شي غريب ما فهمته .. وش قصده بكلامه " الحب بالشرقية " !!!!.. هل كان يمزح ولا كان جاد !!!..
ماحست بعمر اللي قام يبحث عن شريط كرتون يسليه واختار له " حكاية لعبة " .. ودخله بالفيديو وشغله .. بس بعد لحظة رجع يطلع الشريط ويقذفه بالأرض بقوة لما تكسر ، وروّع شوق معه ..
شوق : عمـــر ليـــش كذااااا !!!!..
عمر بعصبية طالعها : ما يشتغل .. خربان .. احثثثثثثثثثثثثثثثن ..
شوق : مايصلح كذا ترميه حتى لو ماكان يشتغل .. قلي يمكن أقدر اصلحه ..
عمر : ما تقدلين .. فهد ما علف ..
شوق : فهد ؟!!
عمر برطم وتكتف بزعل : ايه فهد قالي بثتلي واحد ثاني لك .. بث كذاب ..
شوق : طيب اختار لك أي شريط ثاني غير هذا ..
عمر هز راسه نفي بعناد : لا مابي .. ابي حكاية لععععععبة..
شوق وهي ماسكه ضحكتها : وش اسمها ؟!!..
عمر : حكاية لععععععععبة ..
شوق : هههههههههههههههه .. ليش عاد لععععععععععععبة ؟!!!
عمر وهو مبرطم : بث ..
شوق : طيب حبيبي في عندك أشرطة فيديو كثييييييرة حلوة .. اختار غيرها ..
عمر : لا مابي ..
شوق بملل فكت الرباط اللي كان يضم شعرها وانسدحت عالأرض وغمضت عيونها وتركته بحاله ، وضمت الأرنب اللي كانت ندى ضامته .. وعمر ظل يحوس بأشرطته بس ما لقى شي يرضي غروره وذوقه بالوقت الحالي ..
وبعد مدة سمع صوت فهد يناديه وطااار من الفرحة لأنه حس ان اللي يبيه وصل ..
شوق ظلت مكانها ومغمضة عيونها وهي تسمع فهد ينادي : عمر رح لفهد يناديك ..
وما أمدى عمر يتحرك الا الباب ينفتح ويدخل فهد : عمر حبيبي ..
بسرعة شوق قامت واعتدلت جالسه ورفعت شعرها ، وعمر طار لأخوه وبعيونه الفضول : نعععم ..
فهد كان يطالع شوق اللي ماكانت معطيته بال ولافه عنه ، نزل عينه لعمر مبتسم : جبت لك اللي تبي ..
عمر بابتسامة وسيــعة : حكاية لععععععععبة !!؟!!
فهد وهو يهز راسه : هههههههههه ايه حكاية لعععععععبة .. نفسي افهم وش سر الـ ـعععععععـ عندك ؟!!!..
عمر اخذ الكيس بسرعة ومباشرة دخل الشريط بالفيديو وشغله .. وجلس جنب شوق .. شوي والتفت لفهد اللي لازال واقف مكانه ..
عمر : فهد .. تعااال ثوووف معي
فهد : لا انا بطلع اجلس شوف على راحتك ..
ما أعجبه عمر الكلام وراح لفهد وسحبه معه بالغصب : لا تعااال مععععي ...
جلس عمر وفهد جنبه مجبوور .. وشوق من الجهه الثانية .. كل لحظة كان عمر يضحك عاللي يشوفه وفهد يجاريه بالضحك مع انها مشاهد عادية جدا .. بس عمر كان عاجبه وجود فهد وشوق معه ..
اما شوق ما كانت تضحك لأنها أغلب الوقت سرحانه وتتأمل فهد بين اللحظة والثانية .. وتفكر بالكلام اللي قاله لها ..
واخيرا لما حست انه بينتبه لنظراتها قررت تطلع .. قامت واقفة وانتبه لها عمر ..
عمر : لا تلوحين ..
شوق : خلاص انت اجلس شوف مع فهد انا بروح انام ..
فهد : بدري ..!!
شوق : بدري من عمرك .. بس نعسانه ..
فهد : لاحقين عالنوم اجلسي مع عمر لا تكسرين بخاطره ..
شوق : انت معه الحين ولا يعني انت ما تكفي ..
فهد سكت يطالعها لحظة .. وبنظرة متعجرفة : لا أكفي .. وأوفي بعد ..
شوق هزت كتفها : خلاص اجل انا بطلع .. تصبحون على خير .. ( ولفت للباب )
فهد وهو يتابعها بعيونه : وانتي من اهله ..
راحت شوق لغرفتها مع ان الوقت كان لسا 8.30 .. بس تحس بنعاااس وندى مقومتها بدري ما خلتها تشبع نوم .. زيادة على كذا تبي تهرب من افكارها عن فهد بالنوم ..
وفهد تسمرت عيونه عالباب المغلق من بعدها .. ويفكر بتغير حاله .. كان مصر انه مو يشيلها من قلبه الا ينتزعها انتزاع ولو جافاها ..
بس الحين اذا شافها ما يقدر ينفذ اللي باله .. غصب عنه يطلق لمشاعره العنان والحريه .. ولمتى بيظل على هالحال .. البنت عاشقه ولد خالتها وهو عاشقها .. وهو ؟!!..
وين مكانه .. ؟!!.. مالك مكان يا فهد .. البنت حابه ولد خالتها قبل لا تعرفك ..
تنهد فهد بعمق وانسدح بدوره وغرق بالتفكير .. وبالصدفة طاحت يده على دفتر التلوين جنبه .. وفتحه وبدا يتصفحه بملل وهو يتفرج على تلوين عمر الملخبط وغير المرتب .. قلب صفحه وطلعت له وحده ملونه بشكل أقبح من تلوين عمر بكل الصفحات ..!!!.. وماقدر يمسك ضحكته عالألوان ..

وغرق بالضحك وهو يلتفت لعمر : هههههههههههههههههه .. عمر وش هالتلوين ؟!!!..
عمر لف له وطالع الصفحة وعفس وجهه بضيق ورجع للتلفزيون : مو انا .. هذي سوووق ..
فهد فلتت الضحكه منه : هههههههههههههههههاي .. شوق ؟!!..
وانتبه لأحرف الـ F بكل مكان وبأشكال مختلفة .. قطب مستغرب ولف لعمر : عمر وش ذا ؟!!..
عمر طالع الأحرف ورفع عينه لفهد باستخفاف : حرف الـ F ..
فهد ضربه على راسه بخفه : ادري انه F .. وش شايفني غبي .. اقصد ليش مكتوبه كذا ؟!..
عمر بدا يتضايق لأن فهد يخرب عليه اندماجه مع الفيديو : مدلي .. اسأل سوووق ..
هز فهد راسه بيأس وسكر الكتاب ورماه جنب عمر وقام واقف : انت اذا جلست قبال هالفيديو نسيت الدنيا كلها .. انا بطلع ..
عمر : ...............
هز فهد راسه منه وطلع عنه .. والعواصف داخله تكبر وتكبر .. ومحاولاته مستمره انه يسيطر عاللي داخله لا يكبر أكثر ..

قريب من بيت ابو فهد .. في بيت ابو فواز .. مها بغرفتها مرمية عالسرير تبكي من القهر وبدور عندها تحاول تهديها .. بعد الخطة اللي نفذوها اليوم العصر واللي تكللت بالفشل الذريـع ، رجعت مها لبيتهم مطنقره ودقت مباشرة على بدور تجيها .. وبدور اللي ماتوقعت هالنتيجة جت لها تحاول تهديها ..
بدور : مها بس حبيبتي ترا ما يستاهل كل هالدموع .. هذي اول محاولة قدامنا الأيام .. لا تضيقين صدرك ..
مها مخبية وجهها بالمخدة : ماشفتي شلون رد علي .. ما يحبني يا بدور ما يحبني .. يحبها .. والله يحبها كل شي واضح ..
بدور بسخرية : ومن قالك هالكلام .. اللي يسمعك يقول عايشه معهم بنفس البيت .. تقولين يحبها بس عشانه رد عليك ودافع عنها ؟!!!!...
مها : وموهذا دليل انه يفضلها علي ؟!!!..
بدور : تبين الصراحة يا مها انتي غلطتي بعد .. أجل شلون تقولين لها البيت مو بيتك وقدامه بعد وهي فبيت عمها .. أكيد فهد بيضايقه هالكلام .. هي بنت عمه وما يرضى عليها بعد .. بس انتي مجنونه ما تقدرين تخبين اللي بقلبك .. كان عالأقل جاملتيها ..
مها رفعت وجهها وعيونها تتطاير منها الشرر والحقد : اكرهها يا بدور ما أقدر احبها ما أقدر أطيقها ..
بدور تنهدت وجلست جنبها على طرف السرير : وليش طيب البنت ماسوت شي .. بس الغيرة وما تسوي ..!!
مها : اجل تبينها تاخذ فهد مني وانا اللي كنت احلم فيه من سنين ؟!!!.. من سنين .. من سنين .. مو يوم ولا شهر ..
بدور تغيرت نظرتها وهي تفكر : اول محاولة فشلت .. مع اني كنت اتوقع منه رد غير .. كنت ابيه يتلهف ويصر انه يعرف من وين جبت الرقم .. بس رد علي بعكس كل اللي توقعته .. تصدقين يا مها .. اكتشفت ان فهد صعب ومو بالسهوله اللي توقعتها .. الله يعيني شكلي بتعب معه .. ( وابتسمت لها ) .. بس كل شي يهوون عشانك ..
مها اعتدلت جالسة وبدت تمسح دموعها من خدها بعصبية ولفت لبدور : بدور .. تدرين صرت اكرهه هو بعد !!..
بدور فتحت عيونها وهي تطالع مها : تكرهينه ؟!!.. كذا بسرعه !!!
مها هزت راسها باصرار : أيـه ..!!.. فهد اهاني وطيح وجهي قدامها .. وش تبيني الحق وراه عقب كل اللي سواه فيني .. لكن انا مارح اعديها له .. بعلمه من تكون مها .. مو مها اللي تطيح كرامتها بالأرض ..
بدور مو مصدقه ان هذي مها نفسها : معقووله .. وين الحب راااح .. مو هذا اللي لك ثلاث سنين تحبينه !!؟!!..
مها : لو كان يحبني يا بدور ما كان سوا اللي سواه اليوم .. وانا خلاص بديت أيأس اني اجيبه .. الولد شكله مو طايقني بس مارح اخليه في حاله .. بدفعه ثمن كرامتي اللي انجرحت اليوم ..!!
بدور قربت جنبها وربتت على كتفها تهديها وهي خايفه من قرارها ووعيدها : هدي يا مها .. وخلك في حالك أحسن .. المسافه بينك وبينه بعيده واللي ببالك مهما كان ، صعب ويمكن مستحيل تسوينه ..
مها باصرار وعزيمة وهي تنفض يد بدور من كتفها : ما يهمني .. كل اللي يهمني الحين كرامتي المجروحة ...!!
بدور هزت راسها بيأس : بس يا مها اعترفي انتي غلطتي بحقها .. طبيعي تحصلين هالرد منه !!!..
مها صرخت بعصبية وقاطعتها : لا ما غلطت .. هي تستاهل كذا وأكثر بعد ..
بدور : طيب عطيني سبب واحد يخليها تستاهل اللي قلتيه .. اعترفي بغلطك يا مها ..
مها بعصبية مفرطه : تبي تاخذ فهد مني .. مو هذا سبب كافي يا بدوووور ؟!!..
بدور ماعرفت تفهمها مرة تقول أبيه ومرة لا : طيب انتي تقولين معد تبينه يا مها .. مو فاهمتك .. كنتي تطلبين مني اساعدك والحين معد تبينه .. وتقولين ان شوق تبي تاخذه منك .. فهميني شلون ..
مها بحقد : انا صح معد ابيه ومتأكدة من هالشي .. بس مارح اخليــه لها ..
بدور قطبت تطالع مها اللي نظراتها تحولت للخبث الشديد ، والحقد غطى عيونها عن كل شي حولها ..

بدور بترقب وحذر : وش ناويه عليه ..؟!!
مها ابتسمت بغرابة : اقولك بعدين .. مو وقته ..
بدور بخوف : الله يستر منك .. مها انتي الحين معصبة ومنصدمة .. اصبري شوي وبتتراجعين باللي تفكرين فيه ..
قابل بدور صمت غريب من مها ..
بدور طالعت ساعتها : يالله مهاااوي انا بروح تامرين بشي ..
مها هدت هدوء غريب بعد ما كانت عاصفة هوجاء : سلامتك ..
بدور لبست عبايتها وطبعت بوسة على خد مها وطلعت .. ومها للحين بغمرة افكارها وقهرها وحزنها وحقدها ..


بالمزرعة طلعوا البنات ومعهم نوف اللي رضت تطلع بعد طقاق .. ظلوا يمشون حول الفلة وحوالينها بدون ما يبتعدون ..
بعد عشر دقايق سمعوا صوت دلال تناديهم من بعيد .. التفتوا لها شافوها على ظهر الخيل مع بدر ومقبلين نحوهم ..
نوف لما شافته مسكت فمها بخوف وتراجعت ببطء .. وتخبت خلف شجرة كانت قريبة منهم ..
لما وصلوا نزل بدر ونزل معه دلال اللي كانت منشرحه ومبسووطه عالاخير ..
دلال : فاااتكم والله روعة هالخيل ..
فرح بسخرية : مخلينه لك شكرا ..
حنان لفت لبدر : بالله بدر وينكم رايحين والله لو رايحين للقصيم كان رجعتوا .. حشا ساعة ونص جولة بالمزرعة ..!!!
بدر ابتسم : دلال لعوزتني .. حتى مابغينا نرجع .. تطن وتزن علي خلنا أكثر ..
فرح وعيونها على دلال : مو قلت لك لا تعطيها زود وجه من البدايه .. بس ما سمعتني ..
دلال : وش عليك .. انا واخوي نصلح انتي ليش غيووره ..

فرح : لا تخافين انا ما اغار وخاصة منك ..
دلال انقهرت وتأففت : اووفففف .. انا برووح لنوف داخل أبرك لي من جلستكم اللي تنكد .. ما تخلون احد بحاله ..
فرح : نوف قدام عيونك يالحولا ..!!
دلال بقهر وهي تموه بقبضة يدها بوجه فرح : ترا بوكس الحين .. حولا بعينك وينها .. لا تستغبيني مو لهالدرجة عاد ..!!!
فرح تلفتت حولها باستغراب : بسم الله !!!!!... وين راحت هالجنية .. توها الحين معنا ..!!!..
دلال بسخرية ونص عيون : اقول شكلك انتي المهبوله مو انا .. اجل نوف معنا هاا ؟!!.. لا يكون جنية نوف بس مو نوف نفسها ..
فرح خافت : وجع بسم الله .. لا تذكرينهم قدامي ..
دلال : لا لا لا اكيد جنية نوف مو نوف .. بس انتوا الله يخلف ما تفرقون بين الأنس والجن ..
سهى صرخت : خلااااص ترا بيطلع علينا واحد الحين من كثر ما تذكرينهم ..
دلالوهي تهز كتوفها بثقة : عاااادي أدق صداقه معه ..
بدر كان ساكت بعدها ضحك وهو يسمع سواليف دلال .. متأكد اذا طلع واحد هي أول وحدة بتنحاش ..
حنان ما اهتمت وتلفتت بكل مكان بحيرة : بس صدق تو نوف معنا لما جيتوا .. ما صدقنا تطلع معنا .. بالموت رضت .. وين راحت بهالسرعة اختفت ..!!!
سكت بدر عن الضحك وعرف الحين سبب اختفائها .. وايقن انها متخبية بمكان ما .. والسبب هو .. ماتبي تشوفه ..!!! .. لمتى يعني يا نوووف هالعناد ..!!
بدر تغيرت نظرته للحزن والتفت للبنات : يالله انا راجع للفله ..
فرح : وين خلك معنا ؟!!..
بدر يمثل التعب : لا بروح ارتاح .. ( ويشد شعر دلال بخفة وهو يبتسم ابتسامة تخفي الحزن العميق داخله ) .. هالبنت اتعبتني بروح ارتاح شوية ..
حنان : بهالمكان مافي راحة .. اذا رجعنا للرياض ارتاح على كيفك ..
بدر : لا بروح .. يمكن اذا رحت جنية نوف تطلع .. ( يقصد نوف ) ..
وراح عنهم للفله .. ونوف خلف الشجرة وتسمع لكل شي .. حست بتأنيب الضمير بعد ما لمست في نبرته حزن .. هي الوحيدة اللي حست بهالشي غير باقي البنات .. كملوا طريقهم وطلعت نوف من مكانها وتبعتهم وهي تفكر وهم ما حسوا فيها ..
بعد مدة حست دلال بحركة خلفهم والتفتت تشوف .. دق قلبها خوف ومسكت ببلوزة فرح من الخلف وعيونها تحاول تميز هاللي يمشي وراهم ..
دلال برجفة وهي تبلع ريقها تشد بلوزة فرح : فـ .. ـرح ..
فرح تمشي وتحاول تسحب بلوزتها من دلال : اتركيني دلووول ..!!
بس دلال ما فكتها لانها لمحت طيف يقرب منهم وخافت وصدقت انها جنية نوف ..
صرخت دلال بصوتها الحاد وانحاااشت ركض .. اما سهى وحنان من الروعة تخبوا خلف فرح اللي جمدت مو عارفه تتحرك ..
فرح مغمضة عيونها بخوف شديد ورعدة بجسمها : يا ماااااامي دلوووول الحقينا ..
دلال راااحت بعيد ونادت : لا حبيبتي انا بروووح ..!!!
نوف وقفت مكانها وطالعتهم بدلاخه : شفيكم .. مجانين ؟!!!..
سهى فتحت عيونها وطلت براسها من ورا فرح : من انتي .. نوف ؟!!!..
نوف بسخرية : لا جنية نوف ... أيــه نووف اجل من تحسبون ..؟!!!
فرح : مـ .. متأكدة انك نوووف ..؟!!!..
نوف طفشت منهم وتنرفزت : تستهبلون ولا تستهبلون .. اصلا الشرهه مو عليكم الشرهه علي اللي طعتكم وجيت ..
ولفت عنهم بكل غرور راجعة وهي تضرب بخطواتها بالأرض ..
سمعوا ضحكة دلال وهي ترجع تركض لما وصلت لنوف وسحبتها من ذراعها ..
دلال : ههههههههههههههههه .. نمممزح ماتعرفين للمزح !!!..
نوف : لا والله .. كل هذا وتمزحووون .. يعني انا أخوف ..
فرح وهي تتنفس برعب : وش نسوي دلوول قبل شوي ما وقفت كل شوي تذكرهم صدقنا انهم طلعوا ..!!

دلال رجعت تضحك بعد ما تذكرت اللي صار : ههههههههههههههههههههه .. بس حلو اللي صار لو معنا كاميرا كان يا سلاااااام ..
حنان بسخرية : ايه كان صورناك وانتي مسفحه ركض .. انتي اول وحدة خافت لا تشمتين ..
دلال ضحكت وتقدمتهم وهي تأشر لهم بيدها يتبعونها : تعااااالوا خلوني أوريكم شي ..


بدر دخل الفله وطلع للغرفه فوق المخصصه له هو وولد عمه احمد .. دخل الغرفة وشاف احمد فاتح دفتر ، وسكره بسرعة من دخل عليه ..
بدر ما اهتم باللي شافه ومباشره خلع قبعته ورماها بشكل عشوائي على احمد ، ورمى نفسه عالسرير بتعب ..
بدر يتنهد : آآآآآآآآه ..
احمد ابتسم وهو يشوفه : سلامتك من الآآآآه ...
بدر غمض عينه واسترخى تماما : الله يسلم قلبك ..
احمد : شفيك لا يكون من الحين تعبت .. ترا وراك يوم ثاني الله يعينك عالبنات ..
بدر فتح عين وحدة وطالعه : وليش حاط مسؤليتهم علي .. وانت مرتاااح
احمد ضحك وانسدح عالسرير هو الثاني : تعرفني ما اصبر كثير على طلبات البنات .. يكفوني خواتي الثنتين اللي عن عشر .. تجيني انت وخواتك الثلاث .. كان انهبل .. لا ياخوووي خلني بعيد احسن ..
ضحك بدر ورجع يغمض عيونه ويسرح بخيالات واحلام .. تتمحور كلها حول بنت عمه .. نوف الصغيرة بنظره .. الطفلة البريئة بعينه .. واللي بتظل طفلة صغيرة بعينه مهما طال الزمن ومهما مرت السنين ومهما كبرت ..
فجأة وبدون سابق انذار طلعت كلمات من فمه بدون ما يحس ..
بدر : احمد ... انا أفكر أتزوج ..
احمد فتح عيونه ولف لها بسرعة : نعم ..؟!!..
بدر انتبه لنفسه ولف له : نعم الله عليك .. ما أقصد شي طلعت مني غلط ..
احمد اعتدل جالس : تفكر تتزوج ؟!!..
بدر يصرف الموضوع : قلت افكر .. بس أفكر .. مجرد افكار تروح وتجي ..
احمد باستغراب : لا استغربت فجأة طلعت منك .. لا يكوون جاد .. اذا جاد انا اول واحد ببارك لك ..
بدر ضحك بتصنع : ههههههههههه .. ياحليلك انا قلت لك افكار تروح وتجي .. يعني اليوم اقولك أفكر بكرة الصبح تلقى الفكرة تلاشت من بالي .. انا دايم كذا افكر بأشياء وبسرعة اتناساها .. يعني تقدر تقول هواية عندي ..
احمد ضحك : ههههههههههههه .. بالله وش هالهوايه الغريبة ..!!
بدر ابتسم بعذوبة : بعد هذا ولد عمك واطباعه ما تقدر تغيره ..
احمد ابتسم بدوره : وهذا اللي يميزك .. اقولك يا بدر خلك دايم على اطباعك .. ترا هذا اللي محليك عن الغير .. انت فريد من نوعك على فكره ..
بدر وهو يبتسم بسخريه على نفسه : فريد من نوعي ؟!!..
احمد هز راسه ايجاب : ايوه فريد من نوعك ، ومختلف عن اللي حولك .. احيانا افكر شلون تقدر تبتسم وتضحك طول الوقت .. استغرب والله من قدرتك هذي عالابتسام فترة طويلة ..
بدر رجع له عذابه : آآآآآآه يا احمد لو تدري عن اللي بقلب ولد عمك بس ..
احمد : بدر اذا ضايق من شي ومحتاج شي قولي ترا انا ولد عمك واخوك قبل كل شي ..
بدر بلحظة بغى ينطق ويقول كل شي .. بس تماسك وتدارك نفسه .. وعشان يضيع السالفه قام جالس : تدري ان سلمان بيجي بكره ..
احمد : والله ؟!!.. زين زين .. عشان تحلا الجلسه .. بدل لعوزة هالبنات ..
بدر : انا موصيه اليوم .. وقالي اخلص شغلي اليوم ويجي بكره ..
احمد : وتدري بعد ان بيت خالتي بيجون .. يعني اكيد فهد بيجي بعد ..
بدرابتسم بدهشة : بربــك ؟!!!.. حلو مادام فهد بيجي على الدنيا السلام .. والله نفلّها عالآخر ..!!
احمد ضحك وهي يتخيل وش اللي بيصير .. لأن كل جمعاتهم أربعتهم هو وبدر وفهد وسلمان اذا اجتمعوا طلعت منهم الهوايل والمصايب ..
احمد : الله يستر بس .. من الحين ما ندري وش بنسوي ..
بدر قام واتجه للحمام : انا باخذ لي دش كلي غبار وتراب .. وبعدها بنااام ..
احمد : نوم العوافي ..
دخل بدر الحمام اما احمد رجع لدفتر ندى الجامع لكل أسرارها .. ورجع للصفحة اللي كان متوقف عندها .. وعنوانها ..

" وردة حمراء وخيانة " ..

أهديته وردة .. وأهداني خيانة ..
كلمات مثل الخناجر ..
غُرست بقلبي بقسوة ..
توقعته قلبا حنونا ..
متفهما ..
صادقا ..
لكن
أصبح مستغلا ..
لا أعلم لماذا !!؟؟
ربما لأنه عرف بحبي له ..
وهيامي
وعشقي ..
وولعي ..
كلماته المعسوله أصبحت لغيري
نظراته وهمساته ..
وحتى شخصه ..
اصبح ملكا لغيري ..
وانا ..
مللت الانتظار ..
فليذهب هو وحبه للجحيم ..!!


سكر الدفتر وهو يحس بغصة .. للجحيم ؟!!!.. للجحيم مرة وحدة يا ندى ؟!!.. طيب ليش ؟!!.. أي خيانة وأي علاقات لي تقصدينها ..
ندى أكيد بتجي بكرة .. وبكرة ان شالله موعده معها .. بكرة بيعرف منها كل شي حصل .. كل شي ..
كل شي ..

نوف بعد ما لعوزتهم دلال وودتهم ناحية البقر عافت نفسها ، تسللت بخفة عنهم ورجعت للفله وهي منقرفه من كل شي حولها .. وألم راسها رجع يثور ثاني مرة ..
لما دخلت لقت امها ومرة عمها يجهزون سفرة العشا .. حست بلوعة وغثيان يسري بحلقها ..
ام بدر : قلبي نوف روحي ساعدي الخادمات بالمطبخ وقوليلهم يجيبون أطباق العشا ..
لكن نوف مسكت راسها وحاولت تروح للمطبخ بس ما قدرت تتحرك .. اللوعة تزيد عليها والصداع يضرب براسها ..
ام بدر لاحظت تغير وجهها : شفيك نوف عسى ما شر ..
نوف ما قدرت تنطق .. معدتها بدت تقلب والصداع يذبح ..
دخلوا البنات الفلة وبدخلتهم لفت ام احمد لبنتها : يمه نوف شفيك ..؟!!..
سهى لما لاحظت وجهها المتغير ركضت لها .. ونوف فقدت توازنها وبغت تطيح لولا فرح وسهى اللي ركضوا لها ومسكوها ..
سهى بخوف وذعر : نووووف شفيــــك ؟!!..
ام احمد ركضت لبنتها اللي وجهها بدا يقلب الوان أحمر وأصفر : نووف يمه وش حاسه فيه تكلمي ..
نوف بكلمات باهته شبه ميتة : ط .. ـلعوني فوق ..
ام احمد : شفيك قولي لي .. تبين المستشفى ..
نوف ودموعها تغطي عيونها : لا .. طلعوني فووق .. ابي الحمام ..
وبصعوبة قدروا فرح وسهى يطلعونها فوق بمساعدة من دلال اللي تبعتهم وفتحت لهم باب الغرفة .. ونوف فكت نفسها منهم وحررت ذراعها من يدين سهى وفرح .. وترنحت وهي تتأوه للحمام ، وماسكة فمها بيدها ودخلت وسكرت الباب .. والبنات يراقبونها بفزع .. حاولوا يدخلون يشوفونها اذا بخير أو لا .. بس نوف صارت مقفله الباب ..
سهى وهي ترتجف خوف تدق باب الحمام : نوووووف .. افتحي الباب .. شفيك ..
ما سمعوا لها رد ..
سهى بدق أقوى : نوووووف .. ردي علي .. فيك شي ؟!!!..
وما سمعوا غير صوتها تكح باستمرار وشهقاتها المتقطعة .. وزادوا خوف عليها ..
فرح متلخبطة بعد : نوف افتحي الباب خلينا نساعدك .. شفيك قوليلنا ؟!!..
نوف كانت جالسة على ارضية الحمام ومو قادره تنطق بأي شي .. ووجهها بالكرسي .. نوبات غثيان قاعدة تعصف داخلها .. وبدت ترجع كل اللي داخلها .. مع انها ما كلت غير بسكوت من الصبح الا انها طلعته كله ..
وسهى وفرح ودلال من سمعوا صوتها بهالشكل زادوا خوف ..
وصلت ام احمد لهم وبيدها البنادول ..
ام احمد : وين نوف ؟!..
سهى : بالحمام يمه مو راضيه ترد علينا ..
ام احمد راحت للباب ودقته : نووف يمه افتحي الباب ..
كانوا يسمعون صوتها داخل وهي تتأوه وام احمد ما اتحملت قررت تروح لزوجها او احمد تقولهم .. وقبل ما تطلع انفتح باب الحمام وطلعت نوف وهي تترنح ..
وراحت لها ثاني مرة ومسكتها بيدها : ها نوف شفيك قولي لي ..
نوف تمسك راسها وتحاول تتوازن : راسي يعورني يمه .. يعورني بقوة ابي اناااام ..
ام احمد بقلق : ماتبين تروحين للمستشفى ..
نوف بصعوبة تتكلم وتاخذ نفس بين كل كلمة : لا .. بس ابي انام .. ابي انام .. ودوني لسريري .. ودووووني ..
استسلمت نوف بتعب بين ايادي امها واختها سهى .. وقادوها لسريرها وغطوها .. ام احمد طلبت من سهى تروح تجيب عصير برتقال وهي بقت عند بنتها ..
رجعت سهى بالكاس وشربوها اياها مع حبة بندول .. وتركوها بعد ما استغرقت بالنووم ..
نزلوا تحت واصطفوا كلهم على سفرة العشا .. وام بدر سألتهم بقلق واضح ..
ام بدر : ها شخبارها نوف ..؟!.. شلونها الحين ؟!!
ام احمد : نامت بعد ماعطيتها عصير برتقال وبندول .. ان شالله بكرة بتصير احسن ..
ام بدر : بس هي شفيها ؟!.. فجأة تعبت ؟!!..
ام احمد : اليوم كانت تعبانة ونفسيتها الصبح مو زينة .. وتعبت أكثر لما تحركت واجد .. كان المفروض ترتاح ولا تطلع بهالجو وهي تعبانه ..
ام بدر : حصل خير .. بكرة ان شالله بتتحسن
ام احمد : ان شالله ..

بغرفة احمد وبدر .. قام احمد من السرير بيطلع وقبل ما يفتح الباب التفت لبدر المنسدح عالسرير وسرحااااان ..
احمد : يالله الحين وقت العشا وتلاقي ابوي وعمي ينتظرونا ..
بدر مغمض عيونه : رووح انا تعبان بنام .. بالهنا والشفا ..
احمد : مصر على رايك يعني ..
بدر انقلب عالجهه الثانية وعطاه ظهره : ايه النوم الحين اهم من الاكل ..
احمد بعياره : اجل تصبح على خير يالنوااااام ..!!..
بدر : عيارتك يالدوب !!... مستكثر علي هالكم ساعة اللي بنامها .. آآآآآآآآه بس وين ألاقي راحة البال ..!!..
ضحك احمد عليه وطلع وسكر الباب .. وين الاقي النوم يا احمد واختك العنيدة ملعوزتني .. ومعذبتني معاها ..
قبل ما تنام عينه فتح الجوال وكتب مسج ..

" كلام قلبي كثير ..
ما تقدر هالرساله تشيله ..
لكن كل اللي بقوله ..
تصبح على خير
يا أحلى ما خلق ربي بهالدنيا "

حط الجوال واستسلم للنوم .. اللي كان محاربه لأيام .. وكل فكره وباله عاللي بينفذه قريب ان شالله ..


أحلام وكوابيس رجعت تراودها .. تراودها عنه هو .. صحت نوف منزعجة بشدة من نومها القلق والحلم المزعج اللي أقلق راحتها .. اعتدلت جالسه وهي تفرك عيونها .. ومسكت راسها وهي تحس بالصداع رجع يخف ومافي الا ألم بسيط ..
النور من النافذة يقول ان الوقت كان الفجر والشمس لسا ما أشرقت ولا حل وقتها .. رمت راسها عالوسادة ثاني مرة بس مافي أمل .. النوم جافاها .. تحس بالتعب والارهاق بسبب الانهاك النفسي والافكار .. واللي زاد الطين بلة ..
حلمها الغريب عن بدر رجعت تشوفه ..
تمشي من غير هدى .. وتبحث بعيونها بلهفة عن شي ثمين .. يظهر لها بدر فجأة من لا شئ !!.. تحاول تقرب منه وكل خطوة تمشيها له يبتعد بدر عنها بأضعاف الخطوات .. يبتسم اخيرا لها بحزن ويودعها بيده ويتلاشى بالهوا ..!!!
جلست نوف على طرف السرير وهي ماسكه راسها بقوة .. مو لاقيه له معنى أو تفسير بس ما تدري ليش صار الحلم مصدر قلق بالنسبة لها ..
ذكرتها نفسها ان هالانسان اللي قلقة عليه يصير عدوها والمفروض ما تضعف له .. لازم تفهم نواياه وما تقلق عليه كل هالقلق لأنه ما يستاهل ..
تنهدت نوف بقوة وهي تحس بمشاعرها تناقضها وتناقض هالحقيقة .. بدر مهما كان ولد عمي ومن حقه اني اقلق عليه ..
كانت تتمنى لحظتها تصرخ عشان تفجر اللي بداخلها من شي مكبوت ..
دلال بالسرير الثاني نايمه وغرقانه ومو حاسه فيها .. طالعت نوف بجهة البلكون ومن الشق البسيط بين الستارتين لاحظت ان الدنيا ظلام والشمس مو راضيه تشرق .. ياربي متى بيطلع النور .. أبي اشوف الشمس .. أبي أتأكد اني مو عايشه بظلام الحلم للحين ..
كانت محتاجه تطلع فعشان كذا بدون تردد أو تفكير حتى بحالتها الصحية .. خذت لها جاكيت كبير وطويل لحد الركبة وخذت بيدها قبعة صوفية ، ونزلت تحت .. وكانت نوف تبدو فيه مثل الطفلة الصغيرة البريئة .. طلعت برا وتلقائي رفعت عيونها للسما فوووق .. النجوم للحين تسطع ومضويه .. وضمت نفسها بيديها من لفحة هوا باردة مرت .. وفركت يديها ببعض ومشت مبتعدة عن الفلة بدون تفكير بالمكان اللي تبي تقصده ..
ماكان ببالها مكان معين .. غير انها تبي تمشي وتبعد وتتأمل باللي حولها لعلها ترتاح ..
اشتد البرد ولبست القبعة على راسها وخلت أطراف شعرها القصير يظهر من تحت اذنها ، وتابعت مشيها .. بدون هدف أو مقصد ..
وصلت اخيرا عند شجرة البرتقال القديمة .. أول ماطاحت عليها عيونها ابتسمت بنعومة .. يا الله للحين عايشه !!!..
راحت لها بهدوء ومدت يدها ولامست أوراقها بأطراف اصابعها ..
نوف تتكلم وتخاطب الشجرة : يا الله وش كثر اشتقت لك .. سبحان الله للحين عايشه !!!..
هالشجرة مو عادية بالنسبة لنوف .. لها ذكريات قديمة هنا .. ياما جت وجلست تحتها .. وياما كلت منها وياما لعبت عندها هي واخوانها وبنات عمها و ..... وبدر !!!!!!...
همست باسمه من غير شعور : ..... بدر ؟!!!..
هو الوحيد اللي ماكانت لي ذكريات حلوة معه .. ماكان لي ذكريات حلوة معه ابدا ..
هبت نسمة هوا قوية حركت أغصان الشجر وانسمع حفيفها ، وسمعت نوف معها صوت خرفشة غريبة من الخلف ..
لفت بسرعة تطالع .. ماكان في احد والمكان هادي وساكن .. وخيوط الشمس بدت تنتشر بالكون ..
رجعت نوف عيونها للشجرة وتركتها وكملت جولتها .. وبعد فترة سمعت نفس الصوت الغريب خلفها .. وكأنها اصوات خطوات تمشي على الورق اليابس المتساقط بكل مكان .. لفت نوف ثاني مرة لورا باستغراب ، بس المكان نفسه خالي وما في احد .. مطت نوف شفايفها بتفكير .. مجرد اوهام وخيالات من صنع نفسها .. هزت كتفها بحيرة وعدم اهتمام وكملت طريقها ويديها بجيوب جاكيتها ، وأثناء مشيها لفتت انتباها حوض ورود أول مرة تشوفه .. كان مبين انه جديد ونوع الورود اللي فيه جديدة .. راحت لها وجثت عالأرض بركبتها وحاولت تقطف وحدة بس كان غصنها قوي ومليان شوك .. فبدون ماتنتبه جرحت اصبعها .. وبسرعة بعدت يدها ولمتها وهي تتأوه : آآآي ..
- سلامتك من الآآي ..